Eron o‘zining Rossiya bilan hamkorligi chuqurlashganini, kuchayganini namoyish qilmoqchi. Bu haqda Urushni tadqiq qilish instituti (Institute for the study of war — ISW) tahlilchilari fikr bildirmoqda.
Aynan shuning uchun ham Eron hukumati tomonidan nazorat qilinuvchi OAVlar Rossiya Xavfsizlik kengashi kotibi Nikolay Patrushevning tashrifi haqida xabar bergan (Rossiya uning tashrifini tasdiqlaganicha yo‘q).
Ekspertlar taxmin qilishicha, gap xalqaro auditoriya e’tiborini Moskva va Tehron o‘rtasidagi hamkorik kuchayganiga qaratish, shuningdek, rossiyalik amaldor Ukrainadagi urushda yordam so‘rab Eronga murojaat qilganini nooshkorona ta’kidlash haqida bormoqda.
Avvalroq Eronning IRNA agentligi Tehronga Patrushev yetib kelgani haqida xabar bergandi. Uni Eronga mamlakat Milliy xavfsizlik oliy kengashi kotibi admiral Ali Shamxoniy taklif qilgan. Patrushev nafaqat admiral bilan, balki Eron hukumatining boshqa vakillari bilan uchrashuvlar o‘tkazishi rejalashtirilgan, deb yozdi IRNA. Rossiya Xavfsizlik kengashi kotibiga boshqa mansabdorlar ham hamrohlik qilayotgani aytilgan.
Urushni tadqiq qilish instituti tahlilchilariga ko‘ra, Patrushev Erondan ballistik raketalar sotib olish ehtimolini muhokama qilish uchun kelgan.
Eron va Rossiya bir necha oylar davomida Tehron Moskvaga jangovar uchar qurilmalar yetkazib berilayotganini, ular esa keyin Ukrainada qo‘llanilayotganini rad etib keldi. 5-noyabr kuni Eron tashqi ishlar vaziri birinchi marta Rossiyaga dronlar yuborilayotganini tan oldi, biroq bu Ukrainaga hujumdan avval yuz bergani va gap “kam miqdordagi” dronlar haqida borganini ma’lum qildi.
Ma’lum bo‘lishicha, Rossiya hukumati dronlar partiyasi evaziga Eronga naqd valyuta va Ukrainada qo‘lga kiritilgan G‘arb qurol-yarog‘lari namunalarini yuborgan.
Izoh (0)