Agar Kiyev istamayotgan bo‘lsa, AQSH Ukrainani Rossiya bilan muzokaraga kirishishga “majburlamaydi”. Bu haqda AQSH mudofaa vazirining siyosiy masalalar bo‘yicha o‘rinbosari Kolin Kol ma’lum qildi. Shuningdek, uning so‘zlariga ko‘ra, Ukraina Qrimni harbiy yo‘l bilan qaytarish-qaytarmaslik masalasini o‘zi hal qilishi kerak.
Vashingtondagi Mudofaa yozuvchilar guruhi (Defense Writers Group) bilan onlayn uchrashuvda Koldan AQSH Ukrainaning Qrimni bosib olish harakatlariga moliyaviy yordam beradimi, degan savol so‘raldi.
“Ukrainaliklar harbiy maqsadlari bilan 23-fevraldagi chegaralariga qaytmoqchimi yoki 2014-yildagi, buni o‘zlari hal qiladi. Yakunda bu ularning qarori bo‘ladi”, — deb javob berdi AQSH Mudofaa vaziri o‘rinbosari. Kol Qrimning maqomi faqat Rossiya va Ukraina o‘rtasida muhokama qilinishi mumkinligini ta’kidladi.
Rasmiyning ta’kidlashicha, AQSH maqsadi Kiyev muzokaraga tayyor bo‘lgan paytda uning kuchli pozitsiyada turib ish ko‘rishini ta’minlashdan iborat. Kolning fikricha, kelayotgan qish “keng ko‘lamli hujum operatsiyalari”ni o‘tkazishni murakkablashtiradi, shu bois Ukrainadagi jangovar harakatlar intensivligi kamayishi mumkin.
8-noyabr kuni Ukraina prezidenti Vladimir Zelenskiy Rossiya bilan tinchlik muzokaralarini qayta boshlash uchun bir qancha shartlarini ma’lum qildi, jumladan, ularda mamlakat hududiy yaxlitligini tiklash va barcha yo‘qotishlar uchun tovon to‘lash ilgari surilgan. Politico nashrining xabar berishicha, u AQSH ta’siri ostida Rossiya bilan muzokaralar bo‘yicha o‘z pozitsiyasini yumshatgan. Avvalroq OAV Oq uy Ukraina rahbariyatini Rossiya bilan muzokaraga tayyorligini e’lon qilishga chaqirayotgani haqida yozgandi.
Izoh (0)