AQSH Kongressiga oraliq saylovlar chog‘ida yoppasiga nosozliklar yuz bermoqda, norozilik namoyishlariga chiqish kerak, deya da’vat etdi Amerika sobiq prezidenti Donald Tramp Truth Social ijtimoiy tarmog‘ida.
“Detroytda byulletenlar yo‘qligi bilan bog‘liq vaziyat juda yomon. Odamlar saylovga kelyapti, ular esa ‘kechirasiz, siz allaqachon ovoz berib bo‘lgansiz’, deb qaytarib yuborilyapti. Bunday holatlar boshqa joylarda ham juda ko‘p bo‘lyapti. Norozilikka chiqing, norozilikka chiqing, norozilikka chiqing”, — deb yozdi Tramp.
Kuzatuvchilarning so‘zlariga ko‘ra, deb yozadi The Washington Post, gap saylovlar vaqtida yuz beradigan standart vaziyat, ya’ni ovozlarni hisoblash mashinalari ishdan chiqishi haqida bormoqda. Detroytda Ueyn saylov okrugi saylovchilar ovozlarini hisoblash bilan muammolar yuzaga kelgan va saylov komissiyalari xodimlari qog‘oz ko‘rinishidagi hisobga olish jurnaliga o‘tishga majbur bo‘lgan, bu esa ushlanib qolishlarga sabab bo‘lgan. Biroq Michigan shtati ma’murlari ma’lum qilishicha, muammo tushga kelib hal bo‘lgan.
“Bu yolg‘on. Iltimos, shtatimizda siyosiy zo‘ravonlikni alanga oldirmaslik yoki rag‘batlantirmaslik uchun yolg‘on gaplarni tarqatmang. Umuman, bu hech qayerda kerak emas”, — deya Trampning bayonotiga fikr bildirdi Michigan shtati davlat kotibi Joselin Benson.
Kongressga saylovlar 8-noyabr kuni bo‘lib o‘tdi, so‘nggi ikki yil davomida Demokratlar partiyasi vakillar palatasida ham, senatda ham (vitse-prezident Kamala Xarrisning ovozi hisobiga) ko‘pchilik o‘ringa ega bo‘lib kelgan, bu esa unga nafaqat o‘z vakillarini kongressning asosiy qo‘mitalarida yuqori mansablarga tayinlash, balki prezident Jo Baydenning tashabbuslarini to‘siqlarsiz olib borish imkonini berardi. AQSHda odatda hukmron partiya oraliq saylovlar chog‘ida o‘zidagi o‘rinlarning bir qismidan ajraladi.
Noyabr boshida AQSH prezidenti Jo Bayden Tramp 2020-yilgi prezident saylovlaridagi mag‘lubiyatini tan olishdan bosh tortgani uchun demokratiya xavf ostida qolganini aytgandi. U kongressga saylovlarda yutqazgan taqdirda, o‘z mag‘lubiyatini tan olmaslikka tayyor bo‘lgan siyosatchilar tufayli, bunday vaziyat joriy saylovda ham takrorlanishi mumkinligini ta’kidladi. “Agar biz vakillar palatasi va senatni qo‘ldan boy bersak, kelasi ikki yil dahshatli bo‘ladi”, — dedi Bayden.
Izoh (0)