Samarqand viloyati Oqdaryo tumanida 1-noyabr kuni mast holda avtomobil boshqarib YPX xodimlaridan qochmoqchi bo‘lgan haydovchi uzoqqa bora olmadi, deb xabar bermoqda Ichki ishlar vazirligi.
Qayd etilishicha, holat 1-noyabr kuni soat 08:15 chamasida Oqdaryo tumanidan o‘tgan M-37 avtomobil yo‘lida sodir bo‘lgan. Lacetti mashinasiga YPX xodimlari tomonidan to‘xtash ishorasi berilganda, haydovchi xodimlarning qonuniy talabiga bo‘ysunmay, o‘z yo‘lida harakatlanishni davom ettirgan.
Avtomashina M-37 yo‘lining 6-kilometrida to‘xtatilgan. Mashina tekshirilganda, haydovchi hujjatlarsiz harakatlangani aniqlangan.
Shuningdek, u spirtli ichimlik ichganlikda gumonlanib, alkotester qurilmasi orqali tibbiy ko‘rikdan o‘tkazilgan. Natijada mast ekani aniqlangan.
“Kecha bolalar bilan o‘tirib ichgandik. Qo‘rqib, haydab qochib ketdim. Lekin baribir ushladi”, — degan huquqbuzar.
Haydovchiga nisbatan ma’muriy bayonnoma tuzilib, tegishli chora ko‘rilgan.
Izoh (0)