O‘zbekistonning Xitoydagi elchixonasi tomonidan qishloq xo‘jaligi mahsulotlari eksporti ko‘lamini oshirish, mahalliy korxonalarga salohiyatli xorijiy hamkorlar topish va ishonchli eksport shartnomalarini tuzishda ko‘maklashish maqsadida “O‘zbekiston meva-sabzavot mahsulotlarini Xitoy bozoriga eksporti imkoniyatlari” mavzusida onlayn-taqdimot tashkil etildi, deb xabar bermoqda “Dunyo” axborot agentligi.
Qayd etilishicha, O‘zbekiston eksportchilar uyushmasi hamda Xitoyning Shinjon-Uyg‘ur avtonom hududi tijorat boshqarmasi, “Xitoy—Yevrosiyo Ekspo” tashkiliy qo‘mitasi hamkorligida o‘tkazilgan tadbirda ikki davlatdan 150 dan ortiq yirik eksportchi va importchi korxonalar, uyushmalar vakillari ishtirok etgan.
Ma’lumot uchun, Shinjon-Uyg‘ur avtonom hududining jo‘g‘rofiy joylashuvi va transport imkoniyatlaridan kelib chiqqan holda O‘zbekistonning aksariyat quritilgan va toza meva-sabzavot mahsulotlari Xitoy bozoriga aynan mazkur mintaqa orqali import qilinadi.
Tadbir avvalida O‘zbekiston—Xitoy hamkorligining bugungi o‘sish dinamikasi, 2022-yilda mamlakatlar o‘rtasidagi strategik hamkorlikni har tomonlama mustahkamlashga kuchli turtki bergan oliy darajadagi uchrashuv va muzokaralar to‘g‘risida ma’lumot berilgan.
“Xitoy—Yevrosiyo Ekspo” bosh kotibi o‘rinbosari Mehrigul Tursun o‘z chiqishida so‘nggi yillarda Xitoy va O‘zbekiston “Bir makon — bir yo‘l” tashabbusi doirasida o‘zaro hamkorlikni har tomonlama rivojlantirib, samarali natijalarga erishayotgani, yirik loyihalarni birgalikda amalga oshirayotgani, Samarqand sammiti doirasida “O‘zbekiston—Qirg‘iziston—Xitoy” temir yo‘li loyihasi bo‘yicha muhim qadamlar qo‘yilgani va bu kelgusida ikki tomonlama savdoni keskin oshirishda yangi imkoniyatlar ochishini ta’kidlagan.
Tadbir davomida turli viloyatlarda faoliyat yuritayotgan korxonalar vakillari O‘zbekistonda qishloq xo‘jalik sohasini rivojlantirish bo‘yicha olib borilayotgan islohotlar, meva-sabzavotlarni qayta ishlash va ularning eksport salohiyatini taqdim etgan. Xitoylik importchilarga o‘z mahsulotlarini taklif etib, keyingi mavsum uchun buyurtmalar qabul qilishga tayyorligini bildirgan.
Uchrashuv yakunida o‘zbek tomoni xitoylik tadbirkorlarni qiziqtirgan savollarga batafsil javob bergan. Ikki tomon kompaniyalari o‘rtasida B2B shaklda muzokaralar uchun ma’lumotlar almashilgan.
Izoh (0)