O‘zbekiston adliya vaziri Ruslanbek Davletov va tashqi ishlar vaziri o‘rinbosari Furqat Sidiqov boshchiligidagi delegatsiyaning AQSHga davom etayotgan tashrifi doirasida Amerika rasmiy doiralari, jumladan, Adliya vazirligi va Davlat departamentida uchrashuvlar o‘tkazildi, deb xabar qilmoqda “Dunyo” axborot agentligi.
Qayd etilishicha, AQSH adliya vaziri o‘rinbosari Bryus Shvars bilan uchrashuv doirasida xodimlar malakasini oshirish sohasida hamkorlikni yo‘lga qo‘yish istiqbollari, shuningdek, milliy qonunchilikni takomillashtirish sohasida o‘zaro muloqotni kengaytirish yuzasidan fikr almashilgan.
O‘zbekistonning AQSHdagi elchixonasi xabariga ko‘ra, suhbat chog‘ida Amerika vakillari huquq-tartibot idoralari o‘rtasidagi hamkorlikni kengaytirish, birinchi navbatda, intellektual mulkni himoya qilish, kiberhujumlarga qarshi kurashish, kriminalistika va sud-tibbiyot ekspertizasi sohalarida o‘zbekistonlik mutaxassislar salohiyatini mustahkamlashdan manfaatdorlik bildirgan.
Bryus Shvars AQSH Adliya vazirligining AQSH va O‘zbekiston o‘rtasida jinoiy ishlar bo‘yicha huquqiy yordam to‘g‘risidagi bitimni imzolash masalasini ilgari surishdan manfaatdor ekanini tasdiqlagan.
Tashrif doirasida diniy erkinlikni ta’minlash sohasida muloqotni kuchaytirish maqsadida AQSHning xalqaro diniy erkinlik bo‘yicha maxsus topshiriqlar bo‘yicha elchisi Rashad Husayn bilan ham uchrashuv bo‘lib o‘tgan.
Rashad Husayn Amerika Qo‘shma Shtatlari O‘zbekistonning diniy erkinlik sohasidagi sezilarli yutuqlarini olqishlashini ta’kidlagan. Xorijiy davlatlar va xalqaro institutlar bilan o‘rnatilgan ochiq muloqot va hamkorlik darajasi O‘zbekiston rahbariyatining diniy e’tiqod erkinligini ta’minlash borasidagi qat’iyligidan dalolat berishini qayd etgan. Shuningdek, u AQSH diniy erkinlik sohasidagi qonunchilikni takomillashtirishda O‘zbekistonni qo‘llab-quvvatlashini urg‘ulagan.
O‘zbekiston delegatsiyasining AQSHga tashrifi davom etmoqda.
Izoh (0)