Rossiya prezidenti Vladimir Putin fransiyalik hamkasbi Emmanuel Makron bilan suhbatda Ikkinchi jahon urushi oxirida Xirosima va Nagasakiga atom bombalari tashlanganini eslatib o‘tgan, bu esa Makronni jiddiy tashvishga solgan, deb yozmoqda Daily Mail diplomatik manbalarga tayanib.
Manbalarning aytishicha, Putin suhbatda Yaponiyaning ushbu shaharlarida yadro qurolidan foydalanish Yaponiyaning taslim bo‘lishiga va Ikkinchi Jahon urushi tugashiga olib kelgani haqida fikr bildirgan.
“G‘alaba qozonish uchun yirik shaharlarga hujum qilish shart emas”, — degan u.
“Makron qattiq xavotirga tushdi. Bu Putin Kiyevga tegmasdan Ukraina sharqida taktik yadro qurolini qo‘llashi mumkinligiga juda jiddiy ishora bo‘lib tuyuldi”, — dedi manbalardan biri.
Kreml xabarlariga ko‘ra, Putin va Makron oxirgi marta 11-sentabr kuni telefon orqali gaplashgan. O‘shanda Rossiya prezidenti, xususan, “Ukrainaning Zaporojye atom elektr stansiyasi obyektlariga, jumladan, halokatli oqibatlarga olib keluvchi radioaktiv chiqindilarni saqlash omboriga muntazam hujumlari”ga e’tibor qaratgan.
30-sentabr kuni Putin Donetsk va Lugansk xalq respublikalari, Zaporojye va Xerson viloyatlarini Rossiyaga qo‘shib olish to‘g‘risidagi shartnomani imzolash marosimida AQSH Xirosima va Nagasakida ikki marta yadroviy qurol qo‘llash bo‘yicha amaliyot o‘tkazganini ta’kidladi.
Yadroviy bomba atrofidagi mojaro
Ukrainada urush boshlanganidan beri Rossiya prezidenti Vladimir Putin yadro qurolidan foydalanish ehtimoliga ishora qilmoqda. Sentabr oyida u bu bayonotlar “po‘pisa emas”ligini ta’kidladi. Biroq oktabr oyi oxirida u Rossiyaning Ukrainaga yadroviy zarba berishidan “hech qanday ma’no yo‘q”ligini aytdi.
New York Times gazetasining yozishicha, oktabr oyida Rossiya harbiy rahbariyati Ukrainada taktik yadro qurolidan foydalanish bo‘yicha uchrashuvlar o‘tkazgan.
Oktabr oyida Rossiya mudofaa vaziri Sergey Shoygu va Rossiya Qurolli kuchlari Bosh shtabi rahbari Valeriy Gerasimov AQSH, Buyuk Britaniya, Xitoy va boshqa davlatlarga Ukraina go‘yoki “iflos bomba” yordamida provokatsiya tayyorlayotgani haqida xabar qildi. Keyinchalik MAGATE Rossiyaning bunday bomba ishlab chiqilayotgan bo‘lishi mumkin, deb ko‘rsatgan Ukraina obyektlarini tekshirdi — agentlik rossiyalik harbiylarning da’volarini tasdiqlaydigan hech qanday dalil topmadi.
Izoh (0)