Kengayish va qo‘shnichilik siyosati bo‘yicha Yevropa komissari Oliver Varxelining aytishicha, Ukrainaning Yevropa Ittifoqiga qo‘shilishi uchun tayyorgarlik yillab davom etadi. Bu haqda Varxeli Germaniyaning Welt am Sonntag gazetasiga intervyusida aytdi.
“Yevropa Ittifoqining ichki bozori va boshqa ko‘plab muhim siyosiy sohalarida ishtirok etishga tayyorgarlik ko‘rish uchun zarur bo‘lgan keng ko‘lamli ishlarni inobatga olsak, ittifoqqa qo‘shilish uchun to‘liq tayyorgarlik bir yoki ikki yildan ko‘proq vaqtni olishi mumkin”, — dedi Varxeli.
Shu bilan birga, u “Ukraina islohotlarni tezda olg‘a siljitish va ularni amalga oshirish uchun zarur bo‘lgan ishlarni tezlashtirish tarafdori” deb qo‘shimcha qildi va buni “ijobiy”, deb baholadi.
“Biroq, yettita islohotning hammasini ham tez amalga oshirish imkonsiz”, — dedi Yevropa komissari. Uning so‘zlariga ko‘ra, hozircha muzokaralarni boshlash jadvalini ham kelishib bo‘lmaydi.
O‘z navbatida, Ukraina bosh vazirining Yevropa va Yevroatlantika integratsiyasi bo‘yicha o‘rinbosari Olga Stefanishina mamlakat bu maqsadiga kelasi yil oxirigacha erishish niyatida ekanini ta’kidladi. Uning fikricha, masalan, korrupsiyaga qarshi kurash va adolat sohasida salmoqli islohotlar allaqachon amalga oshirilgan. “Biz uy vazifamizni bajaryapmiz”, — dedi Stefanishina Welt am Sonntag’ga.
Izoh (0)