Yaqinda Turkmanistonda o‘rnatilgan rekordni qayd etgan shaxs Ginness rekordlar kitobi tashkilotiga aloqasi yo‘q bo‘lib chiqdi. Bu haqda “Xronika Turkmenistana” xabar bermoqda.
28-oktabr kuni Axal viloyatining ayni paytda barpo etilayotgan yangi poytaxti yaqinida ochiq osmon ostida sobiq prezident Gurbanguli Berdimuhamedov ko‘rsatmasiga muvofiq, “Organik polizchilik va uning ekologiyaga hissasi” mavzusida seminar o‘tkazilgan, unda 500 nafar agronom ishtirok etgan edi.
Undan avvalroq tadbirga tayyorgarlikni muhokama qilish uchun Ashxobodga “Jahon rekordlarini tashkillashtirish bo‘yicha maslahatchi” Aydin Turkguji kelgani va sobiq prezident Gurbanguli Berdimuhamedov bilan uchrashgani xabar berilgan.
Eurasianet nashri Ginness rekordlar kitobi matbuot xizmati bilan bog‘lanib, Turkguji tashkilot xodimi emasligini aniqlagan.
“Ginness rekordlar kitobi vakillaridan hech kim bu tadbirda qatnashmagan. Janob Turkguji tashkilot vakili emas, biz OAVlarda e’lon qilingan xabarlarga tuzatish kiritish uchun u bilan bog‘landik”, — degan tashkilotdagilar.
Hodisaning o‘zi rekorlar kitobiga kiritish uchun hozircha faqat da’vogarlik qilmoqda.
“Biz jamoamiz bilan foto va video tasvirlar oldik, endi bu materiallarni Jahon rekordlari tashkilotiga yuboramiz, shundan keyin ushbu tadbir Ginness rekordlar kitobiga kirish-kirmasligi masalasi hal qilinadi”, — degan Aydin Turkguji tadbirdan keyin.
Turkmanistonning avvalgi rekordlari
Turkmaniston bundan avval ham turli ko‘rsatkichlar bo‘yicha Ginnesning rekordlar kitobiga kiritilgan. Xususan, 2019-yil 8-avgustda Turkmanboshi shahrida tashkil qilingan tadbir ekologiya bo‘yicha eng katta dars sifatida qayd etilgan.O‘sha yilning o‘zida Ashxoboddagi olimpiya shaharchasida saf tortgan holda eng uzoq davom ettirilgan velosiped paradi o‘tkazilgan.
2018-yil 1-iyun kuni esa “Ashxobod” stadionida velosiped sporti bo‘yicha eng ko‘p odam ishtirokidagi dars uyushtirilgandi.
Shuningdek, 2017-yilda Ashxobod shahrida bunyod etilgan olimpiya shaharchisining ikki obyekti Ginnes rekordlar kitobidan joy olgan edi.
Izoh (0)