AQSH prezidentining milliy xavfsizlik bo‘yicha maslahatchisi Jeyk Sallivan 4-noyabr, juma kuni e’lon qilinmagan tashrif bilan Kiyevga borgan. Bu haqda Bloomberg muxbiri Anna Xordern voqeadan xabardor manbalariga tayanib ma’lum qilgan.
“Jeyk Sallivan bugun Kiyevga e’lon qilinmagan tashrif bilan bordi… Sallivan AQSHning xavfsizlik sohasidagi yangi yordam paketi tafsilotlari bilan bo‘lishdi. Tashrif Eronning Rossiya istilosidagi ishtiroki chuqurlashishi fonida amalga oshirildi”, — deb yozdi jurnalist Twitter’da.
Keyinroq Oq uy Sallivanning Ukraina poytaxtiga tashrifi haqida rasmiy xabar e’lon qildi. “Milliy xavfsizlik bo‘yicha maslahatchi Jeyk Sallivan AQSH Ukraina va uning xalqini o‘z suvereniteti va hududiy yaxlitligini himoya qilishda qat’iy qo‘llab-quvvatlashiga urg‘u berish uchun bugun Kiyevda Ukraina prezidenti Vladimir Zelenskiy, prezident ofisi rahbari Andrey Yermak, mudofaa vaziri Aleksey Reznikov va boshqalar bilan uchrashdi”, — deyiladi xabarda.
Avvalroq AQSH Ukrainaga 400 million dollarlik qo‘shimcha harbiy yordam e’lon qilgan, uning doirasida T-72 tanklari va Hawk zenit-raketa tizimlarini modernizatsiya qilishini aytgandi.
Rossiya maxsus operatsiyasi boshlanganidan keyin Kiyevga amerikalik oliy martabali shaxslar ko‘p marta tashrif buyurgan. Ular orasida davlat kotibi Entoni Blinken va mudofaa vaziri Lloyd Ostin ham bor. Shuningdek, Kiyevga turli vaqtlarda Yevrokomissiya rahbari Ursula fon der Lyayyen, Yevroittifoq diplomatiyasi rahbari Jozep Borrel, Buyuk Britaniya sobiq bosh vaziri Boris Jonson, Polsha, Latviya, Litva va Estoniya prezidentlari Anjey Duda, Egils Levits, Gitanas Nauseda, Alar Karis va boshqa G‘arb diplomatlari ham kelgan.
AQSH prezidenti Jo Bayden Ukrainada rasmiy tashrif bilan bo‘lmagan, biroq u yerga borishga tayyorligini bildirgan. Mart oyida u Polshaning Jeshuva shahriga (Ukraina bilan chegaradan 85 km masofada joylashgan) tashrif buyurgan, u yerda AQSH armiyasining 82-havo-desant diviziyasi bazasi bor.
Izoh (0)