Ukrainada moliyalashtirish bilan bog‘liq muammolar tufayli, 1,3 mingta Starlink terminallari ishlashdan to‘xtadi, bu Ukraina qurolli kuchlari uchun “ulkan muammo”ga aylandi”, deb xabar bermoqda CNN o‘z manbalariga tayanib.
Terminallar o‘tgan hafta boshida, 24-oktabr kuni o‘chirilgan, ularni Kiyev mart oyida sotib olgandi. CNN ma’lumotlariga ko‘ra, SpaceX har bitta Starlink terminali faoliyati uchun bir oyda 2,5 ming dollardan olgan, natijada sentabrga kelib, umumiy xarajatlar 20 million dollargacha o‘sgan, Kiyevning bunday chiqimlarga qurbi yetmagan.
Ukraina qurolli kuchlari tomonidan foydalaniladigan Starlink terminallarining aniq soni noma’lum, biroq ishlashdan to‘xtagan terminallar ularning katta qismini tashkil etadi, deb yozadi CNN. Telekanal eslatishicha, iyul oyida Ukraina Mudofaa vazirligi SpaceX rahbari Ilon Maskdan ko‘proq terminallar taqdim etishni so‘ragan, o‘sha vaqtda harbiylar 4 ming dona qurilmadan foydalanishi aytilgan edi.
Terminallar o‘chirib qo‘yilishidan avvalroq Ukraina Mudofaa vazirligi britaniyalik hamkasblaridan qurilmalardan foydalanganlik uchun 3,25 million dollar miqdorida bir oylik hisobni to‘lab berishni so‘ragan. London terminallar uzilib qolishidan xavotirlanib, oqibatlarni minimallashtirish uchun qurilmalarning bir partiyasi almashtirilgan. CNN’ning britaniyalik mansabdorlar orasidagi manbasi aytishicha, Britaniya hukumati Ukrainaning harbiy ta’minoti masalasi ustunroq, degan qarorga kelgan.
“Biz ukrainalik harbiylar uchun bevosita taktik ahamiyatga ega bo‘lgan bir qator terminallarni qo‘llab-quvvatlayapmiz”, — dedi u va Starlink terminallarini Ukraina qurolli kuchlari uchun “juda muhim” deb atadi.
Pentagondagi manbaga ko‘ra, Maskning ularning ishlashini o‘zi ta’minlamoqchi ekani haqidagi gaplariga qaramay, SpaceX bilan terminallar ishini moliyalashtirish masalasida muzokaralar davom etmoqda. Vashington terminallar uchun to‘lash niyatida.
Rossiya qo‘shinlari Ukrainaga kiritilganidan keyin, SpaceX kompaniyasi mamlakat hukumatiga qariyb 25 mingta Starlink terminallarini taqdim etgan. Ular dronlarni boshqarish, razvedka ma’lumotlarini olish va xavfsiz tarmoqlar bo‘lmagan hududlarda bir-biri bilan muloqot qilish imkonini beradi. Terminallar, shuningdek, Ukraina fuqarolarini ham internet bilan ta’minlaydi.
SpaceX kuz boshida Pentagondan Ukrainada Starlink’ni moliyalashtirishni o‘z zimmasiga olishni so‘ragan, Mask xarajatlarni oyiga 20 million dollarga baholagan. Shundan keyin AQSH prezidenti ma’muriyati ittifoqdoshlar bilan Ukrainani sun’iy yo‘ldosh aloqasi bilan ta’minlash masalasini muhokama qilayotganini bildirgan. Biroq oktabr o‘rtalarida biznesmen Ukrainada aloqani bepul ta’minlashga va’da bergan.
Izoh (0)