Buxoroda bojxonachilar salkam 11 milliard so‘mlik tamaki mahsulotlarining noqonuniy olib kirilishiga chek qo‘ydi. Bu haqda Davlat bojxona qo‘mitasi axborot xizmati xabar berdi.
Qayd etilishicha, Buxoro viloyati “Xo‘jadavlat” temiryo‘l chegara-bojxona posti orqali respublika hududidan tranzit tarzida harakatlanayotgan yuk poyezdi vagonlaridan birida konteyner eshigi, ichki qismidagi belgi va raqamlar aks etgan yorliqlar qo‘lbola usulda o‘zgartirib qo‘yilgani bojxona xodimlarining diqqatini tortgan.
Hujjatlarga ko‘ra mazkur konteynerga 20 tonnadan ziyod og‘irlikdagi, muqaddam foydalanilgan avto ehtiyot qismlari ortilgan bo‘lishi kerak bo‘lgan. Ammo tasvirlarda vagonga boshqa turdagi tovarlar ortilgani aniqlangani sababli konteyner ko‘rikdan o‘tkazishga qaror qilindi.
Natijada konteynerda yuk kuzatuv hujjatlarida ko‘rsatilmagan, umumiy qiymati 10 milliard 610 million so‘mlik 700 ming 719 quti sigaret ortilgani ma’lum bo‘ldi. Hozirda yuqoridagi holat yuzasidan bojxona organlari tomonidan jinoyat ishi qo‘zg‘atildi.
Izoh (0)