Қрим ҳукумати дўст бўлмаган шахслар ва мамлакатларга тегишли бўлган ҳамда миллийлаштириш (давлат мулкига айлантириш) лозим бўлган мол-мулклар ва корхоналар рўйхатини тузишда давом этмоқда, деб ёзади «РБК». Қрим давлат кенгаши раҳбари Владимир Константиновнинг айтишича, гап, шу жумладан, Украина президенти Владимир Зеленскийнинг квартираси ҳақида ҳам бормоқда.
«Бундай объектларнинг барчаси, жумладан, Зеленскийнинг квартираси бўйича аксилтеррорчилик комиссияси иш олиб бормоқда. Ишлар тугаганидан кейин хабар берамиз», — деди у.
Россия Ташқи ишлар вазирлиги май ойида Зеленскийнинг кўчмас мулки мусодара этилишига қарши чиққан эди. «Қонуний асослар бўлмаган ҳолда, хусусий мулкнинг тортиб олинишида нормал нарсани кўрмаяпман. Устига-устак, бу ахборот кампаниясининг бир қисми бўлган бир пайтда», — деган эди вазирлик вакили Мария Захарова.
Чет элликларнинг мол-мулкини мусодара қилиш учун қонунчилик базасини ишлаб чиқиш август ойида Федерация кенгашида таклиф қилинганди.
Reuters маълумотларига кўра, Украина президентининг рафиқаси Елена Зеленская 2013 йил апрелида Қримда «Император» турар жой мажмуасидан хонадон сотиб олган. Зеленскийнинг штаби шундай харид амалга оширилганини тасдиқлаган. Қрим давлат рўйхатига олиш ва кадастр қўмитаси Қрим Украина таркибида бўлган вақтда пайдо бўлган мулкчилик ҳуқуқларининг барчаси Россия қонунчилиги бўйича амалда қолишига ишонтирганди.
Аввалроқ Украина президенти Қримда денгизни томоша қилиш орзуси ҳақида гапирганди. «Ғалабадан кейин Қримга бораман. Денгизни кўришни жуда хоҳлайман», — деди у жанговар ҳаракатлар тугагандан сўнг биринчи навбатда нима қилиши ҳақидаги саволга жавобан.
Зеленскийнинг Қримдаги квартираси унинг 2020 йилги даромадлари ҳақидаги декларациясида ҳам тилга олинганди. Унга кўра, Киевда президентнинг бир нечта квартираси ва автотураргоҳлари бор. Турмуш ўртоғи Елена эса Қрим ҳудудида 129,8 квадрат метрли квартирага эгалик қилади (Қрим 2014 йилда Россия таркибига кирган бўлса-да, декларацияда ушбу мулк Украина ҳудудида жойлашган деб кўрсатилган). Шунингдек, Зеленскийлар жуфтлиги Буюк Британияда ҳам квартира ижарага беради.
Маълумот учун, 2014 йил март ойида Қримда референдум бўлиб ўтган, унда яриморол аҳолисининг аксарияти Россияга қўшилишни қўллаб-қувватлаган. Украина ва бир қатор Ғарб давлатлари овоз бериш натижаларини тан олмайди ва содир бўлган воқеаларни «аннексия» деб ҳисоблайди. АҚШ Қримнинг Россияга қўшилишини ҳеч қачон тан олмасликка сўз берган. Россия ҳукумати бир неча бор Қрим масаласи тарихан ёпиқ эканини таъкидлаган.
2022 йилнинг март ойида Россия президенти матбуот котиби Дмитрий Песков Қримнинг Россия ҳудуди сифатида тан олиниши Украинадаги босқинни тўхтатиши мумкин бўлган шартлардан бири бўлишини айтган.
Изоҳ (0)