Nima uchun qirolicha Yelizaveta II omma oldida doimo sumka bilan ko‘rinish bergan va uning ichida nima saqlagan?

Butun dunyoda sevimli va hurmatga sazovor bo‘lgan qirolicha Yelizaveta II ko‘pchilik tomonidan nafislik va kamchiliklardan holi bo‘lgan uslub timsoli hisoblangan. U 70 yillik hukmronligi davomida qirolicha o‘ziga xos qora sumkasi bilan omma oldida ko‘rinish bergan. Xo‘sh, sumka ichida nima saqlangan? “Noviy ochag” nashri quyida ushbu savolga javob berdi.

Hashamatli sumkalar va boshqa mayda charm buyumlar ishlab chiqaruvchi Britaniyaning yetakchi Launer London brendining qora laklangan sumkasi doimo Yelizaveta II uslubining muhim elementi bo‘lib kelgan. Town & Country nashri ma’lumotlariga ko‘ra, qirolicha brendning 200 dan ortiq sumkalariga ega bo‘lgan. Ulardan eng sevimlilari Royale va Traviata kabi uzun tutqichli modellar edi. Ma’lumotlarga ko‘ra, Launer brendi 1968-yildan boshlab qirolichaga sumkalar yetkazib bergan.

Nega malika doim o‘zi bilan sumka olib yurardi?

Qirolicha nafaqat nafis obraz yaratish, balki xodimlariga maxfiy buyruqlarni yetkazish uchun ham laklangan sumka taqqan. Misol uchun, agar qirolicha sumkasini bir qo‘lidan ikkinchi qo‘liga o‘tkazsa, bu uning suhbatni to‘xtatish uchun biror xodim kelishini so‘raganini anglatadi. Shuningdek, kechki ovqat paytida qirolicha stolga sumkasini qo‘ysa, tadbir besh daqiqa ichida tugashi kerakligini ko‘rsatgan.

Yelizaveta II ning sumkasida nima bor edi?

Qirollik eksperti, “Qirolichaning qo‘l sumkasida nima bor va boshqa qirollik sirlari” kitobi muallifi Fil Dampirning so‘zlariga ko‘ra, qirolicha Yelizaveta II o‘z sumkasida turli xil narsalarni, jumladan, it uchun yegulik olib yurgan.

Damperning aytishicha, qirolicha tez-tez o‘zi bilan suyukli korgisi uchun yeguliklar, krossvord, qalam pichoq, kundalik va kichik kamera olib yurgan. Shuningdek, yakshanba kunlari Yelizaveta II cherkovga tashrif buyurganida, u xayr-ehson qilish uchun sumkasiga 5 funt sterling kupyurasini ham solgan.

Tarjimayi hol uchun qirolichaning do‘stlari va qarindoshlaridan intervyu olgan tarixchi Salli Bedell Smit uning sumkasida yalpizli konfetlar, ko‘zoynak, ruchka, lab bo‘yog‘i, upa va salfetkalar borligini ta’kidladi. Bundan tashqari, sumkada malika uni stol ostiga osib qo‘yishi uchun ilgak borligi ham aytilgan.