Xonanda Mirodil Hakimov mualliflik huquqini buzgani uchun farg‘onalik shoirga jami 140 million so‘m miqdorida tovon puli va ma’naviy zarar to‘laydi. Bu haqda “Daryo”ga Andijon viloyati adliya boshqarmasi ma’lum qildi.
Andijon viloyat adliya boshqarmasining ma’lum qilishicha, sentabr oyida Fuqarolik ishlari bo‘yicha Andijon tumanlararo sudiga “Uylanamiz” qo‘shig‘ining matni muallifidan mualliflik huquqlari buzilishiga chek qo‘yish, mualliflik huquqlari buzilgani uchun tovon puli va ma’naviy zarar undirish haqidagi da’vo arizasi kelib tushgan.
Mazkur da’vo arizasi bo‘yicha fuqarolik ishi qo‘zg‘atilib, sud majlisi 2022-yil 7-oktabrga tayinlangan. 7-oktabr kuni sud majlisiga da’vogarning ishonchli vakili kelgan, javobgar kelmagani sababli sud majlisi 12-oktabrga qoldirilgan. Shu kuni sud majlisiga taraflar kelgan va ulardan ko‘rsatmalar olingan. Javobgar ularga nizoni tinch yo‘l bilan hal qilish uchun muddat berishni so‘ragan va da’vogar tomoni rozi bo‘lgani sababli sud majlisi 19-oktabrga qoldirilgan. Biroq javobgar belgilangan kunida sud majlisiga kelmaganligi sababli sud fuqarolik ishini Fuqarolik protsessual kodeksining 220-moddasiga ko‘ra, javobgarning ishtirokisiz ko‘rib chiqishni lozim topgan.
Sudning hal qiluv qarori bilan da’vo ariza qisman qanoatlantirilib, Mirodil Hakimovdan da’vogar Erkin Doripovga 50 million so‘m ma’naviy zarar uchun kompensatsiya, bazaviy hisoblash miqdorining 300 barobar miqdorida (90 million so‘m) yetkazilgan zarar hisobiga tovon puli undirish belgilangan. Bundan tashqari javobgarning zimmasiga “Uylanamiz” she’ridan muallifning roziligisiz foydalanmaslik majburiyati yuklatilgan.
Avvalroq farg‘onalik shoir Erkin Yo‘ldosh xonanda Mirodil Hakimovdan “Uylanamiz” nomli qo‘shig‘iga mualliflik huquqini talab qilayotgani haqida xabar berilgandi. Andijon viloyati adliya boshqarmasi xonanda she’rni muallif bilan hech qanday shartnoma tuzmasdan huquq egasining ruxsatisiz omma e’tiboriga havola qilgani uchun jarimaga tortilganini ma’lum qilgandi.
Izoh (0)