Xonanda Dilnoz Hakimova “Yashin TV” YouTube kanaliga bergan intervyusida bolaligi, oilasi, yotib olib kuylagan qo‘shig‘ini kuylagan vaqtda mast bo‘lgani haqida tarqalgan mish-mishlarga javobi, kiyinishi haqida salbiy fikr bildiruvchi insonlarga munosabati, tez-tez Moskvaga borishining sababi va chet elda turmush qurgani haqidagi mish-mishlar, “Sayyod.com” bilan ishlagani va hozir nima sababdan prodyuseri yo‘qligi, rasmlari sabab chet eldan nojo‘ya taklif tushgani haqida gapirdi.
“Bizning oilamizda san’atkor, ijodkor insonlar yo‘q”
“Familiyam Hakimova emas, ko‘pchilik Hakimova deb o‘ylaydi, yozadi, hattoki Hakimova deb faxriy yorliqlar berishgan. Instagram’da ham, rasmiy joylarda ham Hakimova deb tanilganman. Aslida familiyam Ne’matullayeva, buni bobomning ismiga o‘zgartirmoqchi bo‘lganman. Hujjatlar bilan muammo bo‘lgani uchun, almashtira olmaganim uchun, Instagram’da akkaunt ochganimda Hakimova deb yozganman. Videolar tarqalib ketgandan keyin hozirgacha Hakimova deyishadi. Ijodda Dilnoz, ismim bilan tanilganman. Farg‘onalikman, oilada uchta qizmiz, men eng kattasiman. Bizning oilamizda san’atkor, ijodkor insonlar yo‘q.
Bizda hamma harbiy yo‘nalishda ishlaydi. Onam mayyor, otam ichki ishlarda, tog‘am, hammalari shu yo‘lda. Men musiqani, raqsga tushishni yoshligimdan yaxshi ko‘rganman, pianinodan Sevara Nazarxonning xolasi dars bergan. Bog‘chada, qo‘shiq aytib, raqsga tushgan paytim, menda iste’dod borligini sezishgan. Keyin musiqa maktabiga berishgan, buning uchun oyimga rahmat aytaman. Ular tig‘iz ish rejasiga qaramay men bilan studiyalarga qo‘shiq yozishga borib doim qo‘llab-quvvatlagan”, — deydi xonanda.
“Bu holatdan xafa bo‘lmaganman”
“Shu holatdan xursand bo‘lgan narsam, yotib kuyladi deyilgan joyda, ‘ichib olibdimi’, ‘chekib olibdimi’, degan ba’zi bo‘lmag‘ur so‘zlar bo‘lgan, biroq qo‘shiqni kuylay olmabdi degan joyi bo‘lmagan. Hamma narsaning asosiysiga e’tibor beraman, men xonandaman, ovozim bilan bog‘liq so‘zlarga e’tibor beraman, ular esa ovozimni gapirmagan. Yotib kuylaymanmi, ‘ichib qotib qolibdi’, degan gaplar bo‘ladimi, o‘zingiz to‘g‘ri bo‘lsangiz bu gaplarga e’tibor bermaysiz. Hech qaysini ichimga olmaganman, bu gaplar men haqimda emas. Agar ayta olmabdi, desa xafa bo‘lardim, bu holatdan esa xafa bo‘lmaganman.
Ha, men yotib kuylagan qizman. Men restoranning tepa qismida qo‘shiq kuylaganman, u joy ‘barniy’ bo‘lgan. Sardor akaning gitarachilari kelib, ‘Dilnoz, men chalib beraman, sen qo‘shiq kuylab ber’, degan. Pastga tushganmiz, xonada shishachalarning ichiga shamlar qo‘yilgan dekoratsiya bo‘lgan”, — deydi Dilnoza Hakimova
Xonanda kiyinishi haqida salbiy fikr bildiruvchi insonlarga munosabati
“Ularga hech narsa demayman. Vaqt o‘tgan sari aql kirarkan. Menda hozir juda ham sokinlik hukm suradi. O‘zim uchun bo‘lib olganman, bu narsa siqilishimga arziydi, bu narsa muhim, unisi muhim emas deganman. Rostini aytaman, juda ko‘p insonlar hayron qoladi, chetdan keladigan fikrlarga uncha e’tibor bermayman. Chunki mening o‘zimning o‘zim haqimdagi fikrim, yon atrofdagi hurmat qilgan insonlarimning men haqimdagi fikri muhim, meni tanimaydigan qancha insonlar bor.
Kuzatuvchilarimdan biri menga “sizning ko‘ylagingiz yoqmadi” deb izoh yozdi. Keyin men uning sahifasining asosiy suratini ko‘zdan kechirdim, qarasam kelinlik libosida tushgan ekan. Men unga javoban “sizning ham kelin ko‘ylagingiz menga yoqmadi, biroq men bu haqda gapirmayapman-ku, dedim. Hammaning o‘z dunyoqarashi bor, uni o‘zgartira olmaysiz. Shuning uchun kimnidir o‘zgartirishga, nimanidir uqtirishga harakat ham qilmaslik kerak. Bu gaplar menga tegmaydi, onamga tegadi. U odamlar kelib yuzimga nimanidir aytmagan, men doim aytaman, yuzimga kelib gapga javobim bor, lekin ko‘rmagan, mavhum insonlarning gapiga javob berishimning o‘zi ahmoqlik.
Men gaplarimda ham, izohlarda ham, vaqtimda ham juda qizg‘anchiqman. Xafa qiladigan tomoni, onam ba’zida yangi klipim chiqsa, uning pastiga izohlarni o‘qir ekan. Shunda 100 ta yaxshi izoh bo‘lib, bitta sal yomoni bo‘lsa onam shuni o‘qib, ichiga kirib, ‘qarang, bolam shu odam o‘zi bunaqa odam ekan, sizga unaqa debdi’, deydi. Ahamiyat bermang, deyman, kuzatuvimdan aytaman, menda salbiy izohlar juda kam. Chunki o‘zim ham bunga yo‘l qo‘ymayman, piar qilmayman, birovlarning shaxsiy hayotimni ko‘rsatmayman. Shaxsiy hayotimni faqat o‘rtoqlarim bilishadi, sahifamga oilamni kam qo‘yaman”, — deydi xonanda.
“Faqat ijod, chetga chiqsam dam olaman”
“Men yaxshi ko‘rib qolishim mumkin, lekin unaqa mubtalo bo‘lib birovning orqasidan Moskvaga borishim mumkin emas. Ko‘p bordim, tan olaman. To‘g‘risini aytaman, ikkita katta loyiha qilyapman, birinchisi armanlar bilan. Hozir Armanistonning chegalari tinch emas, u bari bir ichki atmosferaga ham ta’sir ko‘rsatadi. Shuning uchun Moskvada ham tinchlik bo‘lmasa ham ular men uchun o‘sha yerga kelishyapti. Armanistonlik ijodkorlarning kinosiga sountrack aytganman. Shuni orqasidan ko‘p borib yurdim, endi hozir o‘zimning qo‘shig‘im ustida ish olib borilayotgani uchun boraman. Faqat ijod, chetga chiqsam dam olaman”, — deydi xonanda.
Dilnoza Hakimova Sayyod bilan ishlagani va hozir nima sababdan prodyuseri yo‘qligi haqida
“Hozir prodyuserim yo‘q, o‘sha paytda Sayyod (Sardor Komilov) bilan ishlaganman, keyin ular bilan shartnomani tugatganimdan keyin yangi prodyuser bilan ish boshlanishi kerak bo‘lgan. Bu ikkalamiz tomonimizdan kelishilgan qaror bo‘lgan. Undan keyin boshqa prodyuser bilan ish boshlaganman, shu payt ishlaganimda men prodyuser bilan ishlay olmasligimni tushunganman. O‘zbekistonda prodyuserlik borasida ozgina oqsash bor. Tan olish kerak, O‘zbekistonda prodyuserlik maktabini o‘zi yo‘q. Odamlar prodyuser kimligini bilmaydi, insonlar homiy bilan prodyuserni adashtirib qo‘ygan.
Homiy degani prodyuser emas, prodyuser degani homiy emas. Homiy ijodingiz uchun pul tikadigan inson, u sizning imijingizga, qo‘shiq tanlashingizga, qayerga borishingizga aralashmaydi. Homiylar o‘zini prodyuserman deyapti, ‘men aytgan ashulani aytasiz’, ‘menga shunaqa imij yoqdi, shunaqa chiqasiz’, ‘klipingizning shu joyini olamiz, chunki men shuni xohlayapman’, deydi. Bu juda noto‘g‘ri, chunki ijodkor bilan pulli insonning orasida katta farq bor. O‘zim tan olib hurmat qiladigan insonlarim bor, Shahzodani, Dilso‘zni prodyuseri, ularda hamma narsa yaxshi ishlaydi. Ular bu imij qaysi xonandalarga mos tushishini, qo‘shiqlar qaysi xonandaning ovoziga mos tushishini biladi. Menga homiy bo‘lgan bola ham o‘zini prodyuserman degan va aralashishni boshlagan.
O‘zimga talabchanligimni hisobiga boshqa insonlarga ham talabchanman. Qarasam, u insonlar menga to‘g‘ri kelmadi, shu bilan chiroyli qilib yaxshi notada tugatganman. Hozirgacha prodyuserlardan taklif bo‘ladi, lekin ular menga to‘g‘ri kelmaydi”, — deydi Dilnoza Hakimova.
“Yaqinda nomaqbul takliflar chet eldan ham bo‘ldi. Oxirgi videolarim chet ellik kommentatorlar bilan to‘lib ketdi. Eron va boshqa davlatlardan ko‘p izoh yozishdi. Menimcha o‘sha yerdan taklif keldi, ism-familiyasi, qayerga taklif qilinayotganim yozilgan, ‘bitta zo‘r mehmonxonaning reklama roligi uchun sizni taklif qilyapmiz, gonorarini 10 000 yevro’, dedi. Kelib-ketishingiz hammasi bizning bo‘ynimizda, joyigacha yozilgan. Muammoni tekshirib keyin gaplashamiz, bo‘ldi, adminstrator bilan muloqot qilasiz degan joyimda ‘yo‘q, sizning o‘zingizdan so‘rab olishimiz kerak bo‘lgan shaxsiy ma’lumotlar bor’, deyapti.
Keyin, mayli, so‘rang dedim, buni aytish ham g‘alati, ‘bizning boshlig‘imiz sizni yoqtirib qolibdi, ularni O‘zbekistonda neft biznesi bor’ deb familiyasi va ismini qo‘rqmay yozyapti. ‘Shu inson bilan shaxsiy aloqangiz, munosabatingiz bo‘lishini istayapti, agar shu taklifimiz sizga to‘g‘ri kelsa, ayting’, deyishyapti. Bu narsaga hayron ham qolmayman. Kechirasiz, bu taklifingizni qabul qila olmayman, deb yozdim. Keyin ular ‘bo‘ldi, tushundik, lekin sizga bergan taklimiz o‘z kuchida turibdi, nechtadir davlatda aylanadigan reklama roligida tushib berishingizni xohlaymiz’, deyishdi. Muhimi ularning nima deyishi emas, o‘zingizni qanaqa tutishingiz”, — deydi xonanda.
Izoh (0)