Yakunlangan haftada Namangan viloyati hokimi Shavkat Abdurazzoqovning xizmat avtomobili yo‘lovchini urib yuborgani xabar berildi. Surxondaryo viloyati hokimi To‘ra Bobolovning esa poytaxtda 750 ming dollarga baholangan hovlisi sotilgani xabar berildi. “Daryo” haftaning eng shov-shuvli voqealarini esga olishda davom etadi.
Telegram'dagi “Kompromatuzb” kanalida Namangan viloyati hokimi Shavkat Abdurazzoqovning xizmat avtomobilida YTH sodir etilgani, yo‘lovchi urib yuborilgani xabar berildi. “Daryo” xabarga aniqlik kiritish maqsadida viloyat IIB, YHXB axborot xizmati rahbari Erkin Sattorov bilan bog‘landi.
Ha, voqea sodir bo‘lgan. Viloyat hokimligi axborot xizmati voqea haqida batafsil ma’lumot berishini bildirgan. Shu bois biz bu haqda axborot bermadik. Hozir ham sizga voqea tafsilotlarini ochiqlay olmayman, — deydi “Daryo” bilan muloqotda bo‘lgan viloyat Yo‘l harakati xavfsizligi boshqarmasi axborot xizmati rahbari Erkin Sattorov.Mas’ul YTH bugun sodir etilganini inkor etib, voqea ikki-uch kun avval bo‘lganini bildirdi. Shuningdek, Erkin Sattorov jurnalistning “YTHda odam o‘limi qayd etilmaganmi?”, degan savoliga, “yo‘q” deya javob berdi.
“Daryo”ning mazkur masala yuzasidan qilingan so‘roviga javob bergan Shavkat Abdurazzoqovning matbuot kotibi Farhod Mamadaliyev YTHda yo‘lovchiga zarar yetmaganini, ayni paytda u soppa-sog‘ ekanini bildirdi.
Ko‘p o‘tmay viloyat hokimligi holat yuzasidan o‘rganish natijalarini e’lon qildi.
Ma’lum bo‘lishicha, 7-oktabr kuni soat 12:50 chamasida Namangan viloyati hokimligi tasarrufidagi davlat raqami 50 010 DAV, Toyota Land Cruiser rusumli avtomobil Namangan—Uychi—Uchqo‘rg‘on yo‘lining 8-kilometrida YTHga uchragan. Baxtsiz hodisa tufayli yo‘lni kesib o‘tayotgan, 2017-yilda tug‘ilgan fuqaroni turtib yuborgan. Yo‘lovchi zudlik bilan tuman tibbiyot birlashmasiga olib borilgan. To‘liq tibbiy tekshiruv o‘tkazilgan, jiddiy shikastlanish aniqlanmagan, faqatgina yuz sohasida shilinish bo‘lgan, tez tibbiy yordam ko‘rsatilgan. Qo‘shimcha davolanish talab etilmaydi.
Mazkur haftada, shuningdek, Surxondaryo viloyati hokimi To‘ra Bobolov Toshkent shahridagi hovlisini 750 ming dollarga sotgani xabar berilgandi. Viloyat hokimligi axborot xizmati “Daryo”ning bu haqdagi so‘roviga javob berib, xabarni inkor etdi.
To‘ra Abdiyevich o‘zi haqida tarqalayotgan xabarlardan hayratda. Bugungi xabar ham hech qanday asosga ega emas. Boisi hokimning tug‘ilib o‘sgan qishlog‘i va Termiz shahridagina hovlisi bor, — deydi Murodbek Davlatov.
Yakunlanayotgan haftada shuningdek, Qoraqalpog‘istonda bolalar o‘limi ko‘paygani, tibbiyot tizimida kamchiliklar ko‘pligi tanqid qilindi. Respublika prokurori Erkaboy Tojiyevning qo‘shimcha qilishicha, hududda 2022-yilning o‘tgan davri mobaynida 210 nafar mansabdor korrupsiyaga qo‘l urgan. Natijada tadbirkorlar va davlat manfaatiga 50 milliard so‘m zarar keltirilgan.
Mazkur haftaning eng shov-shuvli voqeasi sifatida O‘zbekiston prezidenti Shavkat Mirziyoyevning issiqxonalari gaz ta’minotidan uzib qo‘yilgan tadbirkorlar muammosiga e’tibor qaratgani bo‘ldi. Davlat rahbari mazkur masala yuzasidan Prezident Adminstratsiyasi rahbari Sardor Umrzoqovga topshiriq bergach, tadbirkorlarning issiqxonalarida bir kunga qayta gaz ta’minotiga ulandi. Sardor Umrzoqov topshirig‘i bilan mazkur masala yuzasidan tekshiruv ishlari boshlab yuborildi.
Izoh (0)