“Shaxmat poytaxtiga aylanishni niyat qildik” — Saida Mirziyoyeva

Toshkentda “Zakovat-Gambit” xalqaro shaxmat musobaqasi yakunlandi. 30-oktabr kuni musobaqa g‘oliblarini tantanali taqdirlash marosimi tashkil etildi, deb xabar bermoqda “Daryo” muxbiri.

Marosimni Milliy mass-mediani qo‘llab-quvvatlash va rivojlantirish jamoat fondi Vasiylik Kengashi raisining o‘rinbosari Saida Mirziyoyeva kirish so‘zi bilan ochib berdi.

“Bundan bir yil avval, ilk bor “Zakovat-Gambit” musobaqasi o‘tkazilganida, orzumiz ro‘yobga chiqishi uchun zamin yaraldi – biz jahonning Shaxmat poytaxtiga aylanishni niyat qildik. Shaxmatda yetakchi bo‘lishni maqsad qildik!

Shaxmatchilarimiz bu yil orzumiz tomon ulkan qadam qo‘ydilar – O‘zbekiston tarixda ilk marotaba shaxmat bo‘yicha yetakchi 20 davlat qatoriga kirdi!

Hayratga loyiq tomoni shundaki, biz bunga yoshlarimiz, yosh grossmeysterlarimiz sababli erishdik!

Bu g‘alabani butun dunyo kuzatdi, xalqaro shaxmat hamjamiyati yigit-qizlarimizni olqishladi! Bir paytlar eng kuchli shaxmatchilarni boshqa davlatlardan taklif qilardik. Endi esa, o‘zimiz jahonning eng oldi qatoridamiz”— deydi Saida Mirziyoyeva.

“Bu yil ushbu musobaqalarga chet ellik shaxmat ustalarini taklif etmadik. Sababi bu yil chempionlar o‘zimizdan. Dunyo tan olgan shaxmat chempionlari o‘zimizning yigitlar. Ular o‘zbekistonliklar va o‘zbek yoshlari. Zakovatli yoshlarimiz hech qachon o‘z oldilariga qo‘ygan maqsad, niyat va orzulariga erisha olamanmi, yo‘qmi, osonmi yoki qiyinmi deb shubha qilmasligi kerak. Mana bizning yigitlarimiz o‘z mehnati bilan harakat qilib, dunyoning manaman degan yetakchi shaxmat ustalari bilan tenglasha olyapti. Haqiqatda ham zakovatda kuch, haqiqatda ham O‘zbekiston yoshlari kuch, O‘zbekiston haqiqiy kuch!”— deydi Komil Allamjonov.

O‘yinning “A” guruh natijalariga ko‘ra quyidagi ishtirokchilar g‘olib bo‘ldi:

1-o‘rin - Javohir Sindorov;

2-o‘rin - Jahongir Vohidov;

3-o‘rin - Muhiddin Madaminov.

9 turda davom etgan “B” guruhi finali yakunida esa quyidagi ishtirokchilar g‘olib bo‘ldi:

1-o‘rin - Humoyun Begmuratov;

2-o‘rin - Oleg Artyomenko;

3-o‘rin - Daler Vohidov.

Shuningdek, “B” guruhida ayollar o‘rtasida eng yaxshi ishtirokchi deb Nafisa Mo‘minova topildi va 20 mln so‘m bilan taqdirlandi.

“C” guruhi finalining g‘oliblari aniqlandi:

1-o‘rin - Afruza Hamdamova;

2-o‘rin - Asrorjon Omonov;

3-o‘rin - Miraziz Kuziyev.

Shuningdek, “C” guruhida ayollar o‘rtasida eng yaxshi ishtirokchi deb Umida Omonova topildi va 20 mln so‘m bilan taqdirlandi.

“D” guruhi finali yakunida quyidagi ishtirokchilar g‘olib bo‘ldi:

1-o‘rin - Islombek Sindorov;

2-o‘rin - Temur Shernazarov;

3-o‘rin - Akbarali Abduhakimov.

Shuningdek, “D” guruhida ayollar o‘rtasida eng yaxshi ishtirokchi deb Barchinoy Shokirjonova topildi va 20 mln so‘m bilan taqdirlanadigan bo‘ldi.

9 turda davom etgan “E” guruhi finali natijalariga ko‘ra:

1-o‘rin - Madinabonu Halilova;

2-o‘rin - Abdumajid Botiraliyev;

3-o‘rin - Abdumalik Halilov.

Shuningdek, “E” guruhida ayollar o‘rtasida eng yaxshi ishtirokchi deb Nilufarxon Imomkuziyeva topildi va 20 mln so‘m bilan taqdirlandi.

Bundan tashqari, turnirning eng yoshi katta ishtirokchisi Raset Ziatdinov hamda eng yoshi kichik ishtirokchisi Oriyat Obidjonovlar 10 mln so‘m bilan taqdirlandi.

Shuningdek, “Zakovat-Gambit” turnirida faol qatnashgan ayol ishtirokchilar - Nilufarxon Imomqo‘ziyeva, Barchinoy Shokirjonova, Umida Omonova va Nafisa Mo‘minovalar ham taqdirlandi.

G‘oliblar quyidagi miqdorda mukofotlandi:

1-o‘rin - 50 million so‘m;

2-o‘rin - 30 million so‘m;

3-o‘rin - 20 million so‘m.