Якунланган ҳафтада Наманган вилояти ҳокими Шавкат Абдураззоқовнинг хизмат автомобили йўловчини уриб юборгани хабар берилди. Сурхондарё вилояти ҳокими Тўра Боболовнинг эса пойтахтда 750 минг долларга баҳоланган ҳовлиси сотилгани хабар берилди. «Дарё» ҳафтанинг энг шов-шувли воқеаларини эсга олишда давом этади.
Telegram'даги «Компроматузб» каналида Наманган вилояти ҳокими Шавкат Абдураззоқовнинг хизмат автомобилида ЙТҲ содир этилгани, йўловчи уриб юборилгани хабар берилди. «Дарё» хабарга аниқлик киритиш мақсадида вилоят ИИБ, ЙҲХБ ахборот хизмати раҳбари Эркин Сатторов билан боғланди.
Ҳа, воқеа содир бўлган. Вилоят ҳокимлиги ахборот хизмати воқеа ҳақида батафсил маълумот беришини билдирган. Шу боис биз бу ҳақда ахборот бермадик. Ҳозир ҳам сизга воқеа тафсилотларини очиқлай олмайман, — дейди «Дарё» билан мулоқотда бўлган вилоят Йўл ҳаракати хавфсизлиги бошқармаси ахборот хизмати раҳбари Эркин Сатторов.Масъул ЙТҲ бугун содир этилганини инкор этиб, воқеа икки-уч кун аввал бўлганини билдирди. Шунингдек, Эркин Сатторов журналистнинг «ЙТҲда одам ўлими қайд этилмаганми?», деган саволига, «йўқ» дея жавоб берди.
«Дарё»нинг мазкур масала юзасидан қилинган сўровига жавоб берган Шавкат Абдураззоқовнинг матбуот котиби Фарҳод Мамадалиев ЙТҲда йўловчига зарар етмаганини, айни пайтда у соппа-соғ эканини билдирди.
Кўп ўтмай вилоят ҳокимлиги ҳолат юзасидан ўрганиш натижаларини эълон қилди.
Маълум бўлишича, 7 октябрь куни соат 12:50 чамасида Наманган вилояти ҳокимлиги тасарруфидаги давлат рақами 50 010 DAV, Toyota Land Cruiser русумли автомобиль Наманган—Уйчи—Учқўрғон йўлининг 8-километрида ЙТҲга учраган. Бахтсиз ҳодиса туфайли йўлни кесиб ўтаётган, 2017 йилда туғилган фуқарони туртиб юборган. Йўловчи зудлик билан туман тиббиёт бирлашмасига олиб борилган. Тўлиқ тиббий текширув ўтказилган, жиддий шикастланиш аниқланмаган, фақатгина юз соҳасида шилиниш бўлган, тез тиббий ёрдам кўрсатилган. Қўшимча даволаниш талаб этилмайди.
Мазкур ҳафтада, шунингдек, Сурхондарё вилояти ҳокими Тўра Боболов Тошкент шаҳридаги ҳовлисини 750 минг долларга сотгани хабар берилганди. Вилоят ҳокимлиги ахборот хизмати «Дарё»нинг бу ҳақдаги сўровига жавоб бериб, хабарни инкор этди.
Тўра Абдиевич ўзи ҳақида тарқалаётган хабарлардан ҳайратда. Бугунги хабар ҳам ҳеч қандай асосга эга эмас. Боиси ҳокимнинг туғилиб ўсган қишлоғи ва Термиз шаҳридагина ҳовлиси бор, — дейди Муродбек Давлатов.
Якунланаётган ҳафтада шунингдек, Қорақалпоғистонда болалар ўлими кўпайгани, тиббиёт тизимида камчиликлар кўплиги танқид қилинди. Республика прокурори Эркабой Тожиевнинг қўшимча қилишича, ҳудудда 2022 йилнинг ўтган даври мобайнида 210 нафар мансабдор коррупцияга қўл урган. Натижада тадбиркорлар ва давлат манфаатига 50 миллиард сўм зарар келтирилган.
Мазкур ҳафтанинг энг шов-шувли воқеаси сифатида Ўзбекистон президенти Шавкат Мирзиёевнинг иссиқхоналари газ таъминотидан узиб қўйилган тадбиркорлар муаммосига эътибор қаратгани бўлди. Давлат раҳбари мазкур масала юзасидан Президент Админстрацияси раҳбари Сардор Умрзоқовга топшириқ бергач, тадбиркорларнинг иссиқхоналарида бир кунга қайта газ таъминотига уланди. Сардор Умрзоқов топшириғи билан мазкур масала юзасидан текширув ишлари бошлаб юборилди.
Изоҳ (0)