27-oktabr kuni Samarqandda IT Village majmuasining ochilish marosimi bo‘lib o‘tdi. Bu haqda IT Park xabar bermoqda.
IT Village — AKT vazirligi tomonidan “Yagona integrator – UZINFOCOM” bilan hamkorlikda ishlab chiqilgan IT sohasining yangi yo‘nalishlari bo‘yicha loyiha.
Axborot texnologiyalari va kommunikatsiyalarini rivojlantirish vaziri Sherzod Shermatov ta’kidlaganidek, IT Village uchun Samarqand viloyatining tanlangani bejiz emas.
Unga ko‘ra, Samarqand har doim o‘zining boy tarixi va azaldan Buyuk ipak yo‘lini bog‘lab turishi bilan nom qozongan. Bugun Samarqand yana e’tibor markazida.
Bu yerda AKT Haftaligi muvaffaqiyatli o‘tkazildi va IT Village’ning ochilishi bo‘lib o‘tdi. IT Village ayniqsa yoshlar uchun yaratilgan. Biz yosh o‘g‘il-qizlarning IT-ta’lim olishda qiyinchiliklarga duch kelmasligi uchun bor kuchimizni solishga harakat qilamiz, — deydi vazir.
Yangi loyiha mamlakatning chekka hududlarida IT infratuzilmasini rivojlantirish, yaqin atrofdagi bolalarni ilg‘or IT-texnologiyalarga jalb qilish va o‘qitish uchun shart-sharoitlar yaratish, shuningdek, xalqaro va mahalliy IT forumlar, dasturchilar uchun xakatonlar va boshqa har qanday IT-texnologiyalarni tashkil etish va o‘tkazishga qaratilgan.
Majmua maydoni 300 kvadrat metr bo‘lgan asosiy blok va texnik blok — 60 kvadrat metrni o‘z ichiga oladi.
Asosiy blokda 60 ta ish o‘rinlari uchun 3 ta o‘quv xonasi bo‘ladi: turar-joy bloki, 15 kishilik konferensiya zali, tibbiy yordam punkti, texnik xonalar, aloqa markazi, eko-kinoteatr va boshqalar.
Izoh (0)