27 октябрь куни Самарқандда IT Village мажмуасининг очилиш маросими бўлиб ўтди. Бу ҳақда IT Park хабар бермоқда.
IT Village — АКТ вазирлиги томонидан «Ягона интегратор – UZINFOCOM» билан ҳамкорликда ишлаб чиқилган IT соҳасининг янги йўналишлари бўйича лойиҳа.
Ахборот технологиялари ва коммуникацияларини ривожлантириш вазири Шерзод Шерматов таъкидлаганидек, IT Village учун Самарқанд вилоятининг танлангани бежиз эмас.
Унга кўра, Самарқанд ҳар доим ўзининг бой тарихи ва азалдан Буюк ипак йўлини боғлаб туриши билан ном қозонган. Бугун Самарқанд яна эътибор марказида.
Бу ерда АКТ Ҳафталиги муваффақиятли ўтказилди ва IT Village’нинг очилиши бўлиб ўтди. IT Village айниқса ёшлар учун яратилган. Биз ёш ўғил-қизларнинг IT-таълим олишда қийинчиликларга дуч келмаслиги учун бор кучимизни солишга ҳаракат қиламиз, — дейди вазир.
Янги лойиҳа мамлакатнинг чекка ҳудудларида IT инфратузилмасини ривожлантириш, яқин атрофдаги болаларни илғор IT-технологияларга жалб қилиш ва ўқитиш учун шарт-шароитлар яратиш, шунингдек, халқаро ва маҳаллий IT форумлар, дастурчилар учун хакатонлар ва бошқа ҳар қандай IT-технологияларни ташкил этиш ва ўтказишга қаратилган.
Мажмуа майдони 300 квадрат метр бўлган асосий блок ва техник блок — 60 квадрат метрни ўз ичига олади.
Асосий блокда 60 та иш ўринлари учун 3 та ўқув хонаси бўлади: турар-жой блоки, 15 кишилик конференция зали, тиббий ёрдам пункти, техник хоналар, алоқа маркази, эко-кинотеатр ва бошқалар.
Изоҳ (0)