O‘zbekistonliklar asosan Qozog‘istonga ko‘chib ketayotgani ma’lum bo‘ldi

Davlat statistika qo‘mitasi 2022-yil uchinchi choragi yakunlari bo‘yicha aholining demografik ko‘rsatkichlarini e’lon qildi.

Yanvar—sentabr oylariga ko‘ra, O‘zbekistondan 3 151 nafar odam domiy yashash maqsadida ko‘chib ketgan. O‘tgan yilning mos davida bu ko‘rsatkich 19 658 kishini tashkil qilgan edi. 

Shu tariqa, doimiy yashash maqsadida O‘zbekistondan ko‘chib ketuvchilar soni bir yil ichida 6,2 barobarga kamaygan. 

O‘zbekistonliklar yil boshidan beri eng ko‘p Qozog‘istonga ko‘chib ketmoqda — 2 198 kishi. Shunga qaramay bu 2021-yilga qaraganda 5 barobarga kamroq. 

Bundan tashqari 2022-yilda O‘zbekistondan Rossiyaga 792 kishi, Tojikistonga 29 kishi, Qirg‘izistonga 28 kishi, Turkmanistonga 18 kishi va boshqa davlatlarga 86 kishi ko‘chib ketgan. 

O‘zbekistonga ko‘chib kelganlar soni yil boshidan beri o‘tgan yilga qaraganda 149 nafarga ko‘payib, 1 489 kishini tashkil qildi. 

Mamlakatga eng ko‘p ko‘chib kelayotganlar orasida ham Qozog‘iston (524 kishi) va Rossiya (475) yetakchilik qilmoqda.