Ukraina noqonuniy ravishda anneksiya qilingan Qrim ustidan suverenitetini, albatta, qayta tiklaydi. Bu haqda Ukraina prezidenti Vladimir Zelenskiy vatandoshlariga videomurojaatida aytdi.
“Biz Qrimni, albatta, ozod qilamiz. Mamlakatimizning ushbu bo‘lagini nafaqat umumukraina, balki umumyevropa zaminiga qaytaramiz”, — dedi Zelenskiy.
Uning so‘zlariga ko‘ra, Ukraina g‘alabasi tufayli Ukrainada qanchalik tez tinchlikka erishilsa, Rossiya boshqa mintaqalarga, jumladan, Eron bilan hamkorlikda Yaqin Sharqqa shuncha kam “yovuzlik sochishga ulguradi”.
Davlat rahbari, shuningdek, 25-oktabr kuni Ukrainaga tashrif buyurgan Germaniya prezidenti bilan juda mazmunli muzokaralar o‘tkazganini aytdi.
“Biz Germaniyadan taqdim etilgan zamonaviy va samarali havo hujumidan mudofaa tizimi uchun juda minnatdormiz. Xuddi shunday yangi tizimlarni kutyapmiz”, — dedi Ukraina rahbari.
Uning so‘zlariga ko‘ra, Ukraina va Germaniya rahbarlari ikki davlat o‘rtasidagi o‘zaro hamkorlikning butun spektrini – mudofaa, siyosiy, moliyaviy sohalarni muhokama qilgan.
“Ukrainani qayta tiklashga katta e’tibor qaratildi, men prezident Shtaynmayerdan bu ishga shaxsan homiylik qilishga tayyorligi uchun minnatdorman. Biz Germaniya bilan qayta qurish sohasida hamkorlikni kuchaytiramiz. Mahalliy hokimiyatlar darajasida ham bu prezident homiyligini oladi”, — deya davom etdi u.
Zelenskiy, shuningdek, Buyuk Britaniyaning yangi bosh vaziri Rishi Sunak bilan telefonda suhbatlashgani, uni Ukrainaga taklif qilgani haqida aytdi.
Izoh (0)