Prezident Shavkat Mirziyoyev ayni vaqtda Respublika shoshilich tibbiy yordam ilmiy markazida videoselektor yig‘ilishini o‘tkazmoqda. Bu haqda “Daryo” muxbiri xabar berdi.
Davlat rahbari tez tibbiy yordam bo‘yicha ikki oy oldin alohida qaror imzolanganini eslab o‘tdi. Ta’kidlanishicha, bu orqali tez tibbiy yordamda chaqiruvga yetib borish vaqti 3 barobarga, xarajatlar 25 foizga qisqarishi reja qilingan.
“2022-yil 1-dekabrga qadar Andijon, Jizzax, Samarqand va Surxondaryoda tez tibbiy yordamning yangi tizimi ishga tushishi kerak edi. Bu ishlar yakuniga yetkazildi. Lekin, Buxoro, Qashqadaryo, Navoiy, Namangan, Xorazm, Toshkent viloyatida qurilish ishlari boshlanmagan”, — dedi prezident.
Shavkat Mirziyoyev, shuningdek, endokrinologiya, Kardiologiya va Xirurgiya markazlarini pastga tushib, hududlar bilan ishlashi bo‘yicha alohida qarorlar qabul qilinganini ham aytib o‘tdi.
“Biroq ushbu qarorlar bo‘yicha ishlar ahvoli barcha hududlarda ham, bir xilda qoniqarli emas. Jumladan, xirurgiya bo‘yicha o‘tgan yili qabul qilingan qarorga muvofiq, 13 ta tumanga 9 turdagi jarrohlik uskuna va jihozlarini olib berish hokimlar zimmasiga yuklatilgan edi. Bu topshiriq ijrosini faqat Kogon tumani boshlagan. Nukus, Bo‘z, Paxtakor, Mirishkor, Konimex, To‘raqo‘rg‘on, Pastdarg‘om, Angor, Boyovut, Parkent, So‘x va Qo‘shko‘pir tumanlari birorta ham o‘zgarish qilmagan”, — dedi davlat rahbari.
Shavkat Mirziyoyevning so‘zlariga ko‘ra, so‘nggi besh yilda 1 370 ta yangi tibbiyot muassasasi qurilib, bunga budjetdan 7,2 trillion so‘m ajratilgan. Lekin hozirda bu obyektlarning 256 tasi tibbiy jihozlar bilan ta’minlanmagan.
“Ushbu muassasalarga 10 mingdan ziyod tibbiy jihozlar xaridi uchun 500 milliard so‘m zarur. Umuman, hali tizimda kamchiliklar, oqsoqliklar va muammoli masalalar ko‘p”, — deydi prezident.
Izoh (0)