Shavkat Mirziyoyev 26-oktabr kuni Respublika shoshilich tibbiy yordam ilmiy markazida videoselektor yig‘ilishini o‘tkazdi. Bu haqda “Daryo” muxbiri xabar berdi.
"Xabaringiz bor, joriy yil mart oyida sizlar bilan ‘ochiq muloqot’ o‘tkazib, barcha masalalarni ochiq-oydin muhokama qilgan edik. Bugungi yig‘ilishimizni ana shu muloqotning mantiqiy davomi, desak, bu ham to‘g‘ri bo‘ladi. O‘ylaymanki, tadbirda ishtirok etayotgan va joylardagi studiyalardan qatnashayotgan tajribali shifokorlarimiz, soha jonkuyarlari va mutasaddilar o‘zlarini o‘ylantirayotgan, qiynayotgan masalalar bo‘yicha fikr-mulohazalari bilan o‘rtoqlashadilar. Soha rivojiga to‘siq bo‘layotgan muammolarga birgalikda yechim topamiz”, — degan davlat rahbari.
Prezident bugungi uchrashuvda qanday savollarga javob topish kerakligini aytgan.
“O‘tgan safargi uchrashuvimizdan keyin tibbiyotdagi vaziyat va shifokorlar faoliyati qay darajada o‘zgardi, mahallada nima yangiliklar bo‘ldi, aholi nimani his qildi, qanday yangi muammolar aniqlandi, degan savollarga birgalikda javob izlashimiz zarur. Bugun ko‘tariladigan barcha masalalar bo‘yicha hokimlarning vazifasi qanday bo‘lishi kerak, prezident sifatida men yana nimalarni hal qilib berishim lozim, degan savollar bo‘yicha ham sizlar bilan atroflicha gaplashib olamiz”, — deya qo‘shimcha qilgan Shavkat Mirziyoyev.
Izoh (0)