Президент Шавкат Мирзиёев айни вақтда Республика шошилич тиббий ёрдам илмий марказида видеоселектор йиғилишини ўтказмоқда. Бу ҳақда «Дарё» мухбири хабар берди.
Давлат раҳбари тез тиббий ёрдам бўйича икки ой олдин алоҳида қарор имзоланганини эслаб ўтди. Таъкидланишича, бу орқали тез тиббий ёрдамда чақирувга етиб бориш вақти 3 баробарга, харажатлар 25 фоизга қисқариши режа қилинган.
«2022 йил 1 декабрга қадар Андижон, Жиззах, Самарқанд ва Сурхондарёда тез тиббий ёрдамнинг янги тизими ишга тушиши керак эди. Бу ишлар якунига етказилди. Лекин, Бухоро, Қашқадарё, Навоий, Наманган, Хоразм, Тошкент вилоятида қурилиш ишлари бошланмаган», — деди президент.
Шавкат Мирзиёев, шунингдек, эндокринология, Кардиология ва Хирургия марказларини пастга тушиб, ҳудудлар билан ишлаши бўйича алоҳида қарорлар қабул қилинганини ҳам айтиб ўтди.
«Бироқ ушбу қарорлар бўйича ишлар аҳволи барча ҳудудларда ҳам, бир хилда қониқарли эмас. Жумладан, хирургия бўйича ўтган йили қабул қилинган қарорга мувофиқ, 13 та туманга 9 турдаги жарроҳлик ускуна ва жиҳозларини олиб бериш ҳокимлар зиммасига юклатилган эди. Бу топшириқ ижросини фақат Когон тумани бошлаган. Нукус, Бўз, Пахтакор, Миришкор, Конимех, Тўрақўрғон, Пастдарғом, Ангор, Боёвут, Паркент, Сўх ва Қўшкўпир туманлари бирорта ҳам ўзгариш қилмаган», — деди давлат раҳбари.
Шавкат Мирзиёевнинг сўзларига кўра, сўнгги беш йилда 1 370 та янги тиббиёт муассасаси қурилиб, бунга бюджетдан 7,2 триллион сўм ажратилган. Лекин ҳозирда бу объектларнинг 256 таси тиббий жиҳозлар билан таъминланмаган.
«Ушбу муассасаларга 10 мингдан зиёд тиббий жиҳозлар хариди учун 500 миллиард сўм зарур. Умуман, ҳали тизимда камчиликлар, оқсоқликлар ва муаммоли масалалар кўп», — дейди президент.
Изоҳ (0)