Prezident Shavkat Mirziyoyev ayni vaqtda Respublika shoshilich tibbiy yordam ilmiy markazida videoselektor yig‘ilishini o‘tkazmoqda. Bu haqda “Daryo” muxbiri xabar berdi.
Davlat rahbarining aytishicha, xavf guruhiga kiruvchi 40 yoshdan oshgan aholini skriningdan o‘tkazish ishlari ayrim hududlarda sust amalga oshirilmoqda.
Xonobod shahri (16 foiz), Marhamat (24 foiz), Qo‘rg‘ontepa, Asaka (37 foiz), So‘x (36 foiz), Qo‘shtepa (41 foiz), Uchko‘prik (42 foiz) va Qibrayda (32 foiz) skrining ishlari ahvoli qoniqarsiz ekani qayd etilgan.
“Birlamchi bo‘g‘inda yechimini kutayotgan eng dolzarb muammolardan yana biri, bu – onalik va bolalikni muhofaza qilish masalasi. Jumladan, yurtimizda 2010 yilgacha yillik tug‘ilish 600 ming atrofida bo‘lgan bo‘lsa, o‘tgan yili bu ko‘rsatkich 950 mingga yetdi. Lekin, shifoxonalarda tug‘ruq o‘rinlarini ko‘paytirish bo‘yicha aniq amaliy ishlar ko‘zga tashlanmayapti. Ya’ni, tug‘ruq o‘rinlari soni hali hanuz 11 mingta bo‘lib qolmoqda. Ayniqsa, vodiy viloyatlari, Samarqand, Qashqadaryo va Surxondaryoda bu masala o‘ta dolzarb hisoblanadi. Misol uchun, Kosondagi 40 o‘rinli tug‘ruq bo‘limiga 55 nafar, Romitanda 35 o‘ringa 45 nafar homilador to‘g‘ri kelayotgani, aholining haqli e’tirozlariga sabab bo‘lmoqda”, — dedi Shavkat Mirziyoyev.
Prezidentning so‘zlariga ko‘ra, bugungi kunda 227 ta tug‘ruq kompleksining 50 foizida issiq suv yoki kanalizatsiya tizimi yo‘q.
“Yil yakuniga qadar respublika bo‘yicha 46 ta tumanlararo perinatal markazlarini tashkil etish bo‘yicha topshiriq berilgan edi. Lekin, 14 ta tumanda ishlar boshlanmagan. Bular: Beruniy, Qo‘ng‘irot, G‘ijduvon, Koson, Chiroqchi, Qamashi, G‘allaorol, Paxtakor, Boysun, Qumqo‘rg‘on, Sherobod, Yangiyo‘l, Quyichirchiq, Bog‘ot tumanlari”, — deya qo‘shimcha qildi Shavkat Mirziyoyev.
Izoh (0)