“G‘afur G‘ulom bog‘ining nomi o‘zgarmaydi” — Chilonzor tumani hokimligi

Toshkent shahri Chilonzor tumanidagi G‘afur G‘ulom bog‘i Dream Park nomi bilan qayta ochilgani xabar qilingandi. Tuman hokimligi axborot xizmati ijtimoiy tarmoqlardagi bog‘ning nomi o‘zgargani bo‘yicha bildirilgan e’tirozlarga munosabat bildirdi.

Qayd etilishicha, bu borada Chilonzor tumani hokimining Ma’naviy-ma’rifiy ishlar samaradorligini oshirish, davlat tili to‘g‘risidagi qonun hujjatlariga rioya etilishini ta’minlash bo‘yicha maslahatchisi bergan ma’lumotlarga ko‘ra, bog‘ning nomlanishiga rasman o‘zgartirish kiritilmagan. Bog‘ nomini o‘zgartirish haqida Geografik obyektlarni nomlash va qayta nomlash masalalari bo‘yicha tuman komissiyasi nomiga ariza kelib tushmagan.

“Albatta, bu borada jamoatchilik fikri ham e’tiborga olinadi. Bog‘ oldin atalgan nomi G‘afur G‘ulom nomidagi bog‘ bo‘lib qoladi”, — deya ma’lumot bermoqda Botir Rasulov.