Rossiya qo‘shinlari Ukrainaning Ivano-Frankovsk shahridagi IESga raketa hujumlarini uyushtirgani haqida xabar berilgandi. Zelenskiy rus qo‘shinlarining muhim obyektlar, jumladan, energetika tizimi obyektlariga bergan zarbalari haqida o‘zining Telegram’dagi kanalida post qoldirdi.
“Bosqinchilar mamlakatimizni terror qilishda davom etmoqda. Kechasi dushman katta hujumni amalga oshirdi: 36 ta raketa, ularning aksariyati urib tushirildi. Barcha havo hujumidan mudofaa xizmatlariga qilgan mehnatlari uchun rahmat aytaman. Hozirgi vaqtda zarbalar ta’sir o‘tkazgan joylarda ishlayotgan va infratuzilmamizni tiklayotgan barcha energetika xodimlariga rahmat. Sizlar bizning qahramonimizsiz!
Fotosurat dushman bizni qanday qilib yengishga urinayotganiga misollardan biridir. Bu muhim ahamiyatga ega obyektlarga dahshatli zarbalardir. Terroristlarga xos taktika. Dunyo bu terrorni to‘xtata oladi va to‘xtatishi ham kerak”, — deydi prezident.
Ma’lumot o‘rnida, Rossiya Ukrainaning muhim infratuzilmasiga hujum qilishni to‘xtatmayapti. Xususan, 19-oktabr, chorshanba kuni ular Ivano-Frankovsk viloyatidagi Burshtin issiqlik elektr stansiyasiga raketa hujumlarini uyushtirgan.
“Bugun viloyatimiz yana raketa hujumlariga uchradi. Burshtin IESga berilgan zarba natijasida yong‘in sodir bo‘ldi. Barcha xizmatlar ishlamoqda, qutqaruvchilar voqea joyida. Xudoga shukur, qurbonlar yo‘q”, — dedi Ivano-Frankovsk viloyati davlat ma’muriyati raisi Svetlana Onischuk Telegram’dagi videomurojaatida.Onischukning eslatishicha, Burtishnskaya IES hududidagi yo‘l to‘sib qo‘yilgan, qo‘shni qishloqlar orqali aylanma yo‘l tashkil etilgan. Ma’muriyat rahbari, shuningdek, avvalroq fuqarolarning elektr energiyasini tejash bo‘yicha mutasaddilarning chaqirig‘iga javoban viloyatda elektr energiyasi iste’moli darajasini 15 foizga kamaytirishga erishilganini ham ta’kidlagan.
“Elektr energiyasini tejashda davom etishimiz zarur. Men hammadan soat 17:00 dan 23:00 gacha ko‘p energiya sarflaydigan elektr jihozlaridan kamroq foydalanishni so‘rayman”, — deya ta’kidladi u.
Izoh (0)