Si Szinpin Xitoy Kommunistik partiyasi rahbari etib uchinchi muddatga qayta saylandi, deb xabar bermoqda Kyodo axborot agentligi.
Qayd etilishicha, Xitoy Kommunistik partiyasi Markaziy qo‘mitasi siyosiy byurosi doimiy qo‘mitasi va KKP Markaziy qo‘mitasi siyosiy byurosining yangi a’zolari nomi ertaga — 23-oktabr kuni e’lon qilinadi. Nashrning yozishicha, kelasi yil bahorida nafaqaga chiqishi kerak bo‘lgan 67 yoshli Davlat kengashi bosh vaziri Li Ketsyan Kommunistik partiyaning oliy boshqaruv organi – Siyosiy byuro doimiy qo‘mitasi a’zoligidan iste’foga chiqqan.
Avvalroq Xitoy sobiq rahbari Xu Szintao Kompartiya qurultoyida zaldan majburan olib chiqib ketilgani haqida xabar berilgan edi. Videolavhalarga qaraganda, 79 yoshli Xu uchun bu kutilmagan vaziyat bo‘lgan, u o‘z joyini tark etishni istamagan.
Xu Szintao prezidiumda mamlakatning amaldagi raisi Si Szinpin bilan yonma-yon o‘tirgan. Xu Szintao prezidiumni tark etayotganida Siga qarata nimadir dedi, u esa bunga javoban bosh irg‘idi. Shundan keyin Xitoy sobiq rahbari majlislar zalidan olib ketilgan.
Qurultoyning yopilish marosimida Xu Szintaoning joyi bo‘sh qolgan. Xitoy Kommunistik partiyasining 16-oktabrdan 22-oktabrgacha bo‘lib o‘tadigan qurultoyidan keyin Si Szinpin yana besh yillik muddatga partiya va mamlakat yetakchisi sifatida saylanishi kutilayotgandi.
Bunga qadar qurultoy delegatlari Xitoy Kommunistik partiyasining yangi Markaziy qo‘mitasi saylagan va rais Si tomonidan taklif etilgan, Kompartiyaning sotsializm haqidagi ustaviga tuzatishlarni ma’qullagan edi.
Xu Szintao 2003-yildan 2013-yilgacha Xitoy yetakchisi bo‘lgan va besh yillik ikkita muddatdan keyin hokimiyatni Si Szinpinga topshirgan.
Izoh (0)