Norvegiyada Putin yaqin do‘stining o‘g‘li hibsga olindi: u ushbu mamlakatda harbiy obyektlarni tasvirga olgani uchun ushlangan yettinchi rossiyalikka aylandi

Norvegiyada yana bir rossiyalik drondan foydalangani va mamlakat muhim infratuzilmasini tasvirga olgani ehtimoli sababli hibsga olindi. Bu Rossiya fuqarosining shunday qonunbuzarlik uchun to‘rtinchi marta qo‘lga olinishidir. Bu safar u Rossiya temir yo‘llari sobiq rahbari Vladimir Yakuninning o‘g‘li bo‘ldi, deb yozadi BBC.

47 yoshli erkakning ikkita — Rossiya va Britaniya pasporti borligi aniqlandi. Sud uni ikki haftaga hibsga olish haqida qaror qabul qildi.

U Rossiya temir yo‘llari sobiq rahbari, Rossiya prezidenti Vladimir Putinning eng yaqin safdoshlaridan biri — Vladimir Yakuninning o‘g‘li bo‘lib chiqdi.

“Bu odam Rossiya va Britaniya fuqaroligiga ega, u Norvegiya hududida, Shpitsbergenda dron uchirgani uchun Sanksiyalar to‘g‘risidagi qonunni buzganlikda ayblanmoqda”, — dedi prokuror Anya Mikkelson Indbyer.

“Politsiya erkakni 17-oktabr kuni Xammerfestda hibsga oldi, undan dronlar va elektron qurilmalarni musodara qildi, ular hozir tahlil qilinmoqda. Drondagi axborot mazmuni ish uchun katta ahamiyatga ega”, — deya aniqlik kiritdi u.

Boshqa hibslar

Bu Norvegiya shimolida bir hafta ichida dronlardan noqonuniy foydalanganlik yoki maxfiy obyektlarni suratga tushirganlik gumonlari bo‘yicha hibsga olish bilan bog‘liq to‘rtinchi holatdir. Rossiya fuqarolariga Norvegiya havo hududida, shu jumladan, Shpitsbergenda va quruqlikdan 12 dengiz mili  masofasida uchuvchisiz uchar qurilmalardan foydalanish taqiqlanadi.

Xelgellan okrug sudi 13-oktabr kuni to‘rt nafar rossiyalik — uch erkak va bir ayolni taqiqlangan obyektlarni tasvirga olgani uchun yetti kunga hibsga olgani haqida Meduza xabar bergandi.

Huquq-tartibot organlari ma’lumotlariga ko‘ra, Norvegiyaga Finlyandiyadan kelgan rossiyaliklar 11-oktabrdayoq qo‘lga olingan. Rossiya raqamlari o‘rnatilgan avtomobilni ko‘zdan kechirish chog‘ida Rossiya fuqarolari avvalroq tasvirga olish taqiqlangan obyektlarni suratga olayotganida payqab qolishganini aniqlashgan.

14-oktabr kuni yana bir Rossiya fuqarosi Tromse aeroportida dron bilan ushlangan. U olgan fotosuratlarda, xususan, harbiy vertolyot bo‘lgan. Rossiyalik ikki haftaga hibsga olingan.

11-oktabr kuni Sturskug chegara punktida Rossiya fuqarosi Vitaliy Rustanovich qo‘lga olingan. Uning fotoapparati va ikkita droni musodara qilingan. Rustanovichning o‘zi professional fotograf ekanligini ta’kidlagan va o‘z safari chog‘ida dronlarni shaxsiy maqsadlarda uchirganini aytgan. Prokuror uning oddiy sayyoh bo‘lishi mumkinligini istisno qilmadi, biroq dronlardan foydalanish barcha rossiyaliklarga, ular nimani tasvirga olishidan qat’iy nazar, amal qilishini qo‘shib qo‘ydi.

Yaxta va Britaniya fuqaroligi

Ochiq manbalarga ko‘ra, Vladimir Yakuninning Andrey ismli o‘g‘li bor, u 1975-yilda tug‘ilgan, London biznes maktabida va Kolumbiya universiteti biznes maktabida o‘qigan. Ayni paytda u oilasi bilan Londonda yashaydi.

U Xammerfestda qo‘lga olingan. Sudda u Buyuk Britaniya fuqarosi ekanini va Italiyada yashashini aytgan. Biroq politsiyachilar erkakning yaxtasidan Rossiya pasportini topib olgan. Firebird yelkanli yaxtasi Birlashgan Qirollik bayrog‘i ostida shu yilning yozidan buyon Shpitsbergen atrofida va Norvegiya sohillari bo‘ylab suzib yurgan.

“U drondan foydalanganini tan oldi, biroq bu noqonuniy ekanini bilmagan. U Buyuk Britaniya fuqarosi”, — dedi advokat va sud qarori ustidan shikoyat arizasi berilishini ma’lum qildi.

Putin do‘stining o‘g‘li

Biznesmen Vladimir Yakunin — Rossiya prezidenti Vladimir Putinning yaqin maslakdoshi. 1990-yillarda ular “Ozero” dacha kooperativi ta’sischilari qatorida bo‘lgan. 2014-yilda Qrim qo‘shib olingach, Vladimir Yakunin AQSH Davlat departamenti sanksiya ro‘yxatiga kiritilgan.

Uning o‘g‘li Andrey shu yil boshida, Ukrainaga bostirib kirilishiga nisbatan qat’iy qarshilik bildirganidan keyin Rossiya OAVlari og‘ziga tushdi. U hech qachon Vladimir Putinga ovoz bermaganini aytdi.

Andrey Yakunin — Britaniyaning Venture Investments & Yield Management investitsiyaviy kompaniyasi asoschilaridan biri, ushbu kompaniya Yevropa va Rossiyada mehmonxonalarga investitsiyalar kiritish bilan shug‘ullangan.

2017-yilda Forbes VIY Management boshqaruvi ostidagi mol-mulkni 1 milliard dollarga baholagan. Andrey Yakuninning o‘ziga tegishli davlat “Delovoy Peterburg” tomonidan 2020-yilda 20,4 milliard rubl (o‘sha vaqtdagi kurs bo‘yicha 275 million dollar)ga baholangan.