Janubiy Koreyaning maishiy texnika ishlab chiqaruvchi LG kompaniyasi Podmoskovyedagi zavodini yopib, korxonani Rossiyadan ko‘chirib olib ketmoqchi: kompaniya O‘zbekiston va Qozog‘istondan birini tanlamoqchi. Bu haqda “Kommersant” xabar berdi.
O‘zbekistonda muzokaralar Artel kompaniyasi bilan olib borilgan, uning zavodlarida, shu jumladan, Samsung texnikasi ham ishlab chiqariladi. Qozog‘istonda LG zavodi 1998-yildan ishlashni boshlagan, ammo bir necha yil avval u yopilib ketgan. Ishlab chiqarishni O‘zbekistonga ko‘chirib o‘tkazish ishchi kuchi arzon bo‘lgani sababli manfaatliroq, ammo Qozog‘istonda sotib olishga qurbi yetadigan iste’molchilar ko‘proq, deydi ekspertlar.
Nashrning maishiy texnika bozoridagi manbasi ma’lum qilishicha, LG rahbariyati Rossiyada sovitgich, kir yuvish mashinasi va televizor ishlab chiqaruvchi zavodni yopish hamda korxonani O‘zbekistonga — Artel zavodiga ko‘chirish ehtimolini muhokama qilmoqda. Uning so‘zlariga ko‘ra, Rossiyadagi LG kompaniyasi top-menejmentining bir qismi allaqachon Toshkentga relokatsiya qilgan. Ko‘chish rejalari haqida TecomDaily bosh direktori Denis Kuskov ham xabar topgan. Artel Electronics nashrga ma’lum qilihsicha, ayni paytda LG bilan sheriklik olib borilmayapti, muzokaralar haqidagi axborot esa fosh etilmayapti.
Shu bilan birga, “Kommersant”ning Qozog‘istondagi manbasi aytishicha, LG ushbu mamlakat hukumati bilan kelishuv olib bormoqda. LG zavodi 1998-yildan boshlab Almatida ishlagan. Qozog‘iston hukumatiga yaqin manbaga ko‘ra, zavod bir necha yil avval yopilgan, hozir esa Raqamli rivojlanish, innovatsiyalar va aerokosmik sanoat vazirligi LG bilan yangi zavodni ochishni muhokama qilmoqda.
“Holodilnik.ru” ma’lumotlariga ko‘ra, 2022-yilning yanvar—avgustida Rossiyada LG’ning kir yuvish mashinalari segmentidagi ulushi 17 foizni (2021-yilning shu davrida — 22%), sovitgichlar segmentida 10% (12%), televizorlar segmentida esa 7,8 foizni (15,2%) tashkil etgan. Riteylerning ma’lumotlariga ko‘ra, ushbu ulushlar tezkorlik bilan pasayishda davom etmoqda. LG menejmenti Rossiyadagi zavod taqdiri haqida qandaydir qaror qabul qilishi kerak, deb hisoblaydi tahlilchi Leonid Delitsin.
“O‘zbekistonda koreys kompaniyalari bilan hamkorlikda faoliyat olib boruvchi korxonalar soni 80 tadan ortiq. Inqilobdan avvalgi va sovet tarixi yakunlari bo‘yicha mamlakatda 200 ming nafar koreys millati vakillari yashaydi, shu sababli ikki mamlakatning turli ishbilarmonlik aloqalari hayron qoldirishi kerak emas”, — deya qayd etdi tahlilchi.
Uning fikricha, ishlab chiqarishni O‘zbekistonga ko‘chirish arzon ishchi kuchi nuqtai nazaridan Qozog‘istonga ko‘chirishdan ko‘ra manfaatliroq bo‘ladi. Biroq, Delitsin aniqlik kiritishicha, Qozog‘iston bozori aholi jon boshiga daromadlar darajasi yuqoriroq bo‘lgani sababli jozibadorroqdir.
“Holodilnik.ru” tijorat direktori Aleksey Pogudalov LG O‘zbekistonga ko‘chib o‘tishiga shubha bildirmoqda.
“Artel’ning bo‘sh korxonalari yo‘q, shuningdek, umuman sotish masalasi ham turibdi”, — dedi u.
Podmoskovyedagi zavod, uning fikricha, mahsulotlarni Rossiya va yaqin xorij mamlakatlarida sotish uchun moslashtirilgandi, ammo ularning aksariyat qismi aynan Rossiya uchun ishlab chiqarilgan. “Rossiyaga yetkazib berishlar to‘sib qo‘yilgan taqdirda, ishlab chiqarishni to‘rt-besh marta qisqartirishga to‘g‘ri keladi”, — dedi Pogudalov.
“Kommersant”ning Qozog‘iston bozoridagi manbasiga ko‘ra, Artel uchun LG bilan hamkorlik qilish manfaatli emas, chunki u holda, koreys brendi Artel’ning o‘ziga raqobatchi bo‘ladi.
Izoh (0)