Zelenskiy Rossiya Xersondagi Kaxovka GESda terakt tayyorlayotganini aytdi

Rossiya harbiylari Xerson viloyatidagi Kaxovka gidroelektr stansiyasida terakt tayyorlamoqda, deb ma’lum qildi Ukraina prezidenti Vladimir Zelenskiy.

“Bizdagi ma’lumotlarga ko‘ra, Kaxovka GES bloklari va dambasi Rossiya terrorchilari tomonidan minalangan”, — dedi Ukraina prezidenti urushning 239-kuni yakunlari bo‘yicha xalqqa murojaatida.

20-oktabr kuni u Bryusseldagi Yevropa kengashi yig‘ilishida onlayn ishtiroki davomida ham shu haqda gapirgan. Uning so‘zlariga ko‘ra, Rossiya armiyasi nazorati ostidagi Kaxovka GESning dambasida taxminan 18 million kub metr suv bor va agar u portlatib yuborilsa, 80 dan ortiq aholi punktlari, jumladan Xerson ham qisqa vaqtda suv ostida qoladi.

Zelenskiy jahon hamjamiyatini ehtimoliy teraktga oldindan javob berishga hamda GESga xalqaro kuzatuv missiyasini yuborishga chaqirdi.

Dambani buzish keng ko‘lamli falokatni anglatadi. Albatta, bosqinchilarga Ukraina hududiga nima bo‘lishining ahamiyati yo‘qligini tushunamiz. Ushbu terakt bilan ular, jumladan, Dneprdan Qrimga suv yetkazib berish imkoniyatini ham yo‘q qilishi mumkin. Kaxovka GES dambasining vayron bo‘lishi bilan Shimoliy Qrim kanali shunchaki yo‘q bo‘lib ketadi. Agar Rossiya shunday terrorchilik harakatini tayyorlayotgan bo‘lsa, bunday ssenariyni jiddiy o‘ylab ko‘rayotgan bo‘lsa, demak, terrorchilar nafaqat Xersonni, balki butun mamlakatimiz janubini, jumladan, Qrimni ham ushlab tura olmasligini juda yaxshi tushunmoqda, — dedi Zelenskiy o‘z murojaatida.