Норвегияда яна бир россиялик дрондан фойдалангани ва мамлакат муҳим инфратузилмасини тасвирга олгани эҳтимоли сабабли ҳибсга олинди. Бу Россия фуқаросининг шундай қонунбузарлик учун тўртинчи марта қўлга олинишидир. Бу сафар у Россия темир йўллари собиқ раҳбари Владимир Якуниннинг ўғли бўлди, деб ёзади BBC.
47 ёшли эркакнинг иккита — Россия ва Британия паспорти борлиги аниқланди. Суд уни икки ҳафтага ҳибсга олиш ҳақида қарор қабул қилди.
У Россия темир йўллари собиқ раҳбари, Россия президенти Владимир Путиннинг энг яқин сафдошларидан бири — Владимир Якуниннинг ўғли бўлиб чиқди.
«Бу одам Россия ва Британия фуқаролигига эга, у Норвегия ҳудудида, Шпицбергенда дрон учиргани учун Санкциялар тўғрисидаги қонунни бузганликда айбланмоқда», — деди прокурор Анья Миккельсон Индбер.
«Полиция эркакни 17 октябрь куни Хаммерфестда ҳибсга олди, ундан дронлар ва электрон қурилмаларни мусодара қилди, улар ҳозир таҳлил қилинмоқда. Дрондаги ахборот мазмуни иш учун катта аҳамиятга эга», — дея аниқлик киритди у.
Бошқа ҳибслар
Бу Норвегия шимолида бир ҳафта ичида дронлардан ноқонуний фойдаланганлик ёки махфий объектларни суратга туширганлик гумонлари бўйича ҳибсга олиш билан боғлиқ тўртинчи ҳолатдир. Россия фуқароларига Норвегия ҳаво ҳудудида, шу жумладан, Шпицбергенда ва қуруқликдан 12 денгиз мили масофасида учувчисиз учар қурилмалардан фойдаланиш тақиқланади.Хелгеллан округ суди 13 октябрь куни тўрт нафар россиялик — уч эркак ва бир аёлни тақиқланган объектларни тасвирга олгани учун етти кунга ҳибсга олгани ҳақида Meduza хабар берганди.
Ҳуқуқ-тартибот органлари маълумотларига кўра, Норвегияга Финляндиядан келган россияликлар 11 октябрдаёқ қўлга олинган. Россия рақамлари ўрнатилган автомобилни кўздан кечириш чоғида Россия фуқаролари аввалроқ тасвирга олиш тақиқланган объектларни суратга олаётганида пайқаб қолишганини аниқлашган.
14 октябрь куни яна бир Россия фуқароси Тромсе аэропортида дрон билан ушланган. У олган фотосуратларда, хусусан, ҳарбий вертолёт бўлган. Россиялик икки ҳафтага ҳибсга олинган.
11 октябрь куни Стурскуг чегара пунктида Россия фуқароси Виталий Рустанович қўлга олинган. Унинг фотоаппарати ва иккита дрони мусодара қилинган. Рустановичнинг ўзи профессионал фотограф эканлигини таъкидлаган ва ўз сафари чоғида дронларни шахсий мақсадларда учирганини айтган. Прокурор унинг оддий сайёҳ бўлиши мумкинлигини истисно қилмади, бироқ дронлардан фойдаланиш барча россияликларга, улар нимани тасвирга олишидан қатъий назар, амал қилишини қўшиб қўйди.
Яхта ва Британия фуқаролиги
Очиқ манбаларга кўра, Владимир Якуниннинг Андрей исмли ўғли бор, у 1975 йилда туғилган, Лондон бизнес мактабида ва Колумбия университети бизнес мактабида ўқиган. Айни пайтда у оиласи билан Лондонда яшайди.У Хаммерфестда қўлга олинган. Судда у Буюк Британия фуқароси эканини ва Италияда яшашини айтган. Бироқ полициячилар эркакнинг яхтасидан Россия паспортини топиб олган. Firebird елканли яхтаси Бирлашган Қироллик байроғи остида шу йилнинг ёзидан буён Шпицберген атрофида ва Норвегия соҳиллари бўйлаб сузиб юрган.
«У дрондан фойдаланганини тан олди, бироқ бу ноқонуний эканини билмаган. У Буюк Британия фуқароси», — деди адвокат ва суд қарори устидан шикоят аризаси берилишини маълум қилди.
Путин дўстининг ўғли
Бизнесмен Владимир Якунин — Россия президенти Владимир Путиннинг яқин маслакдоши. 1990 йилларда улар «Озеро» дача кооперативи таъсисчилари қаторида бўлган. 2014 йилда Қрим қўшиб олингач, Владимир Якунин АҚШ Давлат департаменти санкция рўйхатига киритилган.Унинг ўғли Андрей шу йил бошида, Украинага бостириб кирилишига нисбатан қатъий қаршилик билдирганидан кейин Россия ОАВлари оғзига тушди. У ҳеч қачон Владимир Путинга овоз бермаганини айтди.
Андрей Якунин — Британиянинг Venture Investments & Yield Management инвестициявий компанияси асосчиларидан бири, ушбу компания Европа ва Россияда меҳмонхоналарга инвестициялар киритиш билан шуғулланган.
2017 йилда Forbes VIY Management бошқаруви остидаги мол-мулкни 1 миллиард долларга баҳолаган. Андрей Якуниннинг ўзига тегишли давлат «Деловой Петербург» томонидан 2020 йилда 20,4 миллиард рубль (ўша вақтдаги курс бўйича 275 миллион доллар)га баҳоланган.
Изоҳ (0)