Rossiyalik deputat ayollarni ham muddatli harbiy xizmatga chaqirishni boshlashni taklif qildi

Rossiya Davlat dumasi deputati Aleksey Chepa rossiyalik ayollar muddatli harbiy xizmatga chaqirilishi kerakligini aytdi, deb yozadi “Ura.ru”.

Armiyaga muddatli xizmat uchun chaqirilish rossiyalik ayollarga nisbatan ham amal qilishi kerak, dedi Davlat dumasining “Adolatli Rossiya — vatanparvarlar — Haqiqat uchun” partiyasidan deputati Aleksey Chepa “Ura.ru”ga bergan intervyusida.

“Xuddi Isroildagidek boshlashni taklif qilaman. Shuningdek, hamma ayollarni ham”, — dedi Chepa Federatsiya kengashi Vladimir Jabarovning muddatli harbiy xizmatchilarni tayyorlash davomiyligini ikki yilgacha oshirish taklifini qo‘llab-quvvatlar ekan.

Deputat aniqlik kiritishicha, armiyada bir yil xizmat o‘tash harbiylarga ham, Mudofaa vazirligiga ham kam foyda keltiradi, chunki bunday muddatda odamni harbiy mutaxassislikka o‘rgatish qiyin.

Deputatning so‘zlariga ko‘ra, ayni paytda mamlakatda qo‘lidan hech narsa kelmaydigan muddatli harbiy xizmatchilar ko‘p sonli. Shu bilan birga, Chepa qayd etishicha, shartnoma asosidagi harbiy xizmatga o‘tish konsepsiyasi ushbu sohani rivojlantirishda to‘g‘ri yo‘nalish bo‘lgan bo‘lardi, biroq unga o‘tish “inqilobiy emas, silliq” no‘lishi kerak.

Avvalroq Federatsiya kengashining xalqaro masalalar bo‘yicha qo‘mitasi raisining birinchi o‘rinbosari Vladimir Jabarov armiyada ikki yillik xizmatga qaytish haqida o‘ylab ko‘rish taklifini kiritgan edi. Uning so‘zlariga ko‘ra, bu Rossiya Qurolli kuchlari tarkibini ko‘paytirib, harbiylarni tayyorlash sifatini yaxshilashi mumkin bo‘lardi.

Bu g‘oyani Davlat dumasining mudofaa bo‘yicha qo‘mitasi rahbari o‘rinbosari Yuriy Shvitkin ham qo‘llab-quvvatladi. Bundan tashqari, u maktablarda boshlang‘ich harbiy tayyorgarlik kurslarini kiritish haqida o‘ylab ko‘rishga ham chaqirdi.