Amerikalik biznesmen Ilon Mask Twitter’ni sotib olsa, kompaniya xodimlarining 75 foizini ishdan bo‘shatmoqchi, deya xabar berdi The Washington Post (WP) manbalar va korporativ hujjatlarga tayanib. Ularning so‘zlariga ko‘ra, Mask bilan kelishuv amalga oshmagan taqdirda ham Twitterda keng ko‘lamli qisqartirishlar bo‘lishi kutilmoqda.
WP ma’lumotlariga ko‘ra, Twitter’da 7500 xodim ishlaydi. Agar Ilon Maskning rejasi amalga oshsa, u holda kompaniyada 2 mingga yaqin xodim qoladi. Ammo kelishuv muvaffaqiyatsizlikka uchragan taqdirda ham, Twitter’ning hozirgi rahbariyati kelasi yil oxirigacha ish haqi fondini taxminan 800 million dollarga qisqartirishni rejalashtirgan. Bu xodimlarning deyarli to‘rtdan bir qismi ishdan bo‘shatilishini anglatadi. Kompaniya, shuningdek, o‘z infratuzilmasini, jumladan, ma’lumotlar markazlarini “jiddiy qisqartirish” niyatida.
Twitter xodimlari Ilon Maskning rejalaridan xabar topgach, sarosimaga tushdi. Ulardan ba’zilari bunga Twitter’da turli memlar bilan munosabat bildirdi. Jumladan, Twitter’ning katta moliyaviy tahlilchisi Parker Lyons “qachonki shu 75 foizni ichida sen ham borligingni anglaganingda” degan so‘zlar bilan amerikalik sobiq professional basketbolchi Mejik Jonsonning “men u yerda bo‘lmayman” deya bosh chayqab turgan tasvirini joyldi.
Shuningdek, u bitta o‘yinda 136 ochko yig‘gan, 112 ribaund va 118 marta to‘p uzatishni amalga oshirgan MBA yulduzi Rassel Uestbrukning suratini joylashtirib, unga “qolgan 1900 nafar xodim” deya izoh berdi.
Twitter kompaniyasining o‘zi xodimlarni ishdan bo‘shatish rejalarini rad etmoqda. Reuters xabariga ko‘ra, bu haqda 20-oktabr kuni kompaniya bosh yuridik maslahatchisi Shon Edjett xodimlarga elektron pochta orqali ma’lum qilgan.
Maskning Twitter’ni sotib olish rejalari aprel oyida ommaga ma’lum bo‘lgandi, biroq u iyul oyida taklifini qaytarib oldi. Bitim to‘xtatilgani sababli Twitter biznesmen ustidan sudga murojaat qilgan. Oktabr oyida Ilon Mask ijtimoiy tarmoqni sotib olish bo‘yicha kelishuvni yakunlashga qaror qildi. Sud unga 28-oktabrgacha vaqt berdi.
Izoh (0)