Америкалик бизнесмен Илон Маск Twitter’ни сотиб олса, компания ходимларининг 75 фоизини ишдан бўшатмоқчи, дея хабар берди The Washington Post (WP) манбалар ва корпоратив ҳужжатларга таяниб. Уларнинг сўзларига кўра, Маск билан келишув амалга ошмаган тақдирда ҳам Twitterда кенг кўламли қисқартиришлар бўлиши кутилмоқда.
WP маълумотларига кўра, Twitter’да 7500 ходим ишлайди. Агар Илон Маскнинг режаси амалга ошса, у ҳолда компанияда 2 мингга яқин ходим қолади. Аммо келишув муваффақиятсизликка учраган тақдирда ҳам, Twitter’нинг ҳозирги раҳбарияти келаси йил охиригача иш ҳақи фондини тахминан 800 миллион долларга қисқартиришни режалаштирган. Бу ходимларнинг деярли тўртдан бир қисми ишдан бўшатилишини англатади. Компания, шунингдек, ўз инфратузилмасини, жумладан, маълумотлар марказларини «жиддий қисқартириш» ниятида.
Twitter ходимлари Илон Маскнинг режаларидан хабар топгач, саросимага тушди. Улардан баъзилари бунга Twitter’да турли мемлар билан муносабат билдирди. Жумладан, Twitter’нинг катта молиявий таҳлилчиси Паркер Лёнс «қачонки шу 75 фоизни ичида сен ҳам борлигингни англаганингда» деган сўзлар билан америкалик собиқ профессионал баскетболчи Межик Жонсоннинг «мен у ерда бўлмайман» дея бош чайқаб турган тасвирини жойлди.
Шунингдек, у битта ўйинда 136 очко йиғган, 112 рибаунд ва 118 марта тўп узатишни амалга оширган МБА юлдузи Рассел Уэстбрукнинг суратини жойлаштириб, унга «қолган 1900 нафар ходим» дея изоҳ берди.
Twitter компаниясининг ўзи ходимларни ишдан бўшатиш режаларини рад этмоқда. Reuters хабарига кўра, бу ҳақда 20 октябрь куни компания бош юридик маслаҳатчиси Шон Эджетт ходимларга электрон почта орқали маълум қилган.
Маскнинг Twitter’ни сотиб олиш режалари апрель ойида оммага маълум бўлганди, бироқ у июль ойида таклифини қайтариб олди. Битим тўхтатилгани сабабли Twitter бизнесмен устидан судга мурожаат қилган. Октябрь ойида Илон Маск ижтимоий тармоқни сотиб олиш бўйича келишувни якунлашга қарор қилди. Суд унга 28 октябргача вақт берди.
Изоҳ (0)