Ilon Mask global retsessiya qancha davom etishini prognoz qildi

Amerikalik biznesmen Ilon Maskning fikricha, global inqiroz 2024-yilning bahorigacha davom etishi mumkin. Bu haqda “RBK” xabar bermoqda.

Tadbirkor Dogecoin kriptovalyutasi hammuassisi Billi Markusning Twitter’dagi postiga javob tariqasida bu haqida prognozlarini bildirgan.

Koronavirusdan kasallanish holatlari juda past. O‘ylaymanki, hozir tashvishlanishimiz kerak bo‘lgan narsa — yaqinlashib kelayotgan global retsessiya va yadroviy apokalipsisdir, — deb yozadi Markus.

Mask bunga javoban, haqiqatan ham “dahshatli global hodisasiz yana kamida bir yil yashasak yaxshi bo‘lardi” deb ta’kidladi.

Bunga javoban Markus tadbirkorning retsessiya qancha davom etishi haqidagi fikrlarini so‘radi.

Menda faqat taxminlar bor — ehtimol, 2024-yilning bahorigacha, — deb yozgan Mask.

O‘tgan hafta Xalqaro valyuta fondi kelasi yilgi global iqtisodiy o‘sish prognozini iyul oyida kutilgan 2,9 foizdan 2,7 foizga tushirdi.

Ma’lumotlarga ko‘ra, joriy yoki keyingi yilda jahon iqtisodiyotining uchdan bir qismi qisqarishi va uchta yirik iqtisodiyotda — AQSH, Yevropa Ittifoqi va Xitoyda retsessiya davom etishi prognoz qilinmoqda.

Ko‘pchilik uchun 2023-yildagi vaziyat retsessiya sifatida qabul qilinayotgan bo‘lsa ham, eng yomoni hali oldinda, — deydi XVF bosh iqtisodchisi.

Avvalroq Xalqaro valyuta fondi 2023-yilda global YIM prognozini pasaytirgani haqida xabar berilgandi.