“Turkiya gaz ta’minoti markaziga aylanadi” — Erdo‘g‘on

Turkiya prezidenti Rajab Toyyib Erdo‘g‘on mamlakati tabiiy gaz ta’minoti markaziga aylanishiga ishonch bildirdi. Uning so‘zlariga ko‘ra, bu borada Rossiya prezidenti bilan kelishib olingan. Bu haqda Sinxua xabar bermoqda.

O‘zi rahbarlik qilayotgan Adolat va taraqqiyot partiyasi yig‘ilishida so‘zga chiqqan Erdo‘g‘on Turkiyaning Rossiya gazini olishi va shu tariqa gaz markaziga aylanishini aytdi. So‘nggi uchrashuvda tomonlar bu borada kelishib olgan.

12-oktabr kuni Moskvada bo‘lib o‘tgan “Rossiya energetika haftaligi” xalqaro forumida Putin Rossiya Turkiya orqali Yevropaga gaz yetkazib berishi mumkinligini aytdi va Yevropaga yetkazib berish uchun Turkiyada eng yirik gaz markazini yaratishni taklif qildi.

Shundan so‘ng Erdo‘g‘on va Putin Osiyoda hamkorlik va ishonch choralari bo‘yicha kengashning oltinchi sammitida yopiq eshiklar ortida uchrashdi.

Uchrashuv yakunlari bo‘yicha Turkiya prezidenti Energetika va tabiiy resurslar vazirligiga Rossiyaning tegishli idoralari bilan hamkorlik qilish va yangi gaz uzelini qurish bo‘yicha ishlarni boshlash bo‘yicha topshiriq berganini ma’lum qildi.

Mavzuga doir: Tarixdagi eng qiyin vazifa: Rossiya Yevropa Ittifoqini o‘z gazini sotib olishga majburlash yo‘lini qidirmoqda