2022-yilning yanvar—sentabr oylarida O‘zbekistonning tashqi savdo aylanmasi 36 mlrd dollarni tashkil etib, 2021-yilga nisbatan 7,7 mlrd dollarga yoki 27,2 foizga ko‘paydi. Bu haqda Davlat statistika qo‘mitasidan ma’lum bo‘ldi.
Tashqi savdo aylanmasida eksport hajmi 14 mlrd dollarga (35,7 foizga ko‘paydi) va import hajmi 22 mlrd dollarga (22,3 foizga ko‘paydi) yetdi. Hisobot davrida – 7,9 mlrd dollar qiymatida passiv tashqi savdo balansi qayd etildi.
Tashqi iqtisodiy faoliyat bo‘yicha 20 ta yirik hamkor-davlatlar orasidan uchta davlatda faol tashqi savdo balansi kuzatilgan. Bular — Qirg‘iz Respublikasi, Afg‘oniston va Tojikiston. Qolgan 17 ta davlatlar bilan passiv tashqi savdo balansi saqlanib qolmoqda.
O‘zbekiston eng ko‘p eksport qilayotgan davlatlar orasida Rossiya yetakchilik qilmoqda — 2,2 mlrd dollar. O‘tgan yilning mos davrida bu borada Xitoy 1,8 mlrd dollar bilan birinchi o‘rinda edi. Uchinchi o‘rinda Turkiya bormoqda — 1,2 mlrd dollar.
Rossiya va Ukraina o‘rtasidagi urush oqibatida O‘zbekistonning Ukrainaga eksporti keskin qisqardi. 2021-yilning 9 oyida Ukrainadan eksport tushumlari 141,8 mln dollarni tashkil qilgan bo‘lsa, joriy yilda bu ko‘rsatkich 53,8 foizga kamayib 65,5 mln dollar bo‘ldi.
O‘zbekiston eksporti tarkibida eng yuqori ulushni Toshkent shahri 23,3 foiz bilan, eng quyi ulushni esa Jizzax viloyati 1,1 foiz bilan egallagan.
Izoh (0)