Amerikalik iqtisodchi Nuriel Rubini dunyo nafaqat inflyatsiyaning keskin o‘sishiga, balki stagflyatsiyaga ham duch kelishini kutmoqda. Bu haqda “Kommersant” xabar berdi.
Uning fikricha, jahon iqtisodiyotidagi vaziyat G‘arbiy Yevropada 1970-yillarda sodir bo‘lgan neft inqirozidan ham yomonroq bo‘ladi.
Nuriel Rubini 2008-yilgi iqtisodiy inqirozni prognoz qilgan va shu tufayli mashhurlikka erishgan iqtisodchi hisoblanadi.
“Odd lots” podkastida Nuriel Roubini iqtisodiyotga koronavirus va Rossiyaning Ukrainadagi urushi ta’sir ko‘rsatganini aytdi. Bundan tashqari, u global iqtisodiyotga salbiy ta’sir ko‘rsatgan yana 11 ta omilni sanab o‘tdi.
Ular orasida: proteksionizm, deglobalizatsiya, ishlab chiqarishni Xitoydan Yevropa va AQSHlarga o‘tkazish, aholining qarishi, migratsiyaning cheklanganligi, Vashington va Pekin o‘rtasidagi munosabatlarning yomonlashuvi, geosiyosiy xavflar, iqlim o‘zgarishi, kiber urushlar, daromadlar tengsizligi, dedollarizatsiyalar mavjud.
Bu safar inqiroz yetmishinchi yillardagidan ham yomonroq bo‘ladi, chunki u shunchaki qisqa muddatli hodisa emas. Markaziy banklar inflyatsiya bilan har qanday narxda, hatto tanazzul bo‘lsa ham, hatto og‘ir oqibatlar bo‘lsa ham kurashamiz, deyishsa, ishonmayman, — deydi ekspert.
Unga ko‘ra, bu qisqa va sayoz retsessiya emas, balki undan ham battarroq bo‘ladi, keyin esa moliyaviy qiyinchiliklar, moliyaviy va qarz inqirozlari paydo bo‘ladi.
Rubinining so‘zlariga ko‘ra, natijada “stagflyatsion qarz inqirozi global moliyaviy inqirozdan keyingi o‘rinda turuvchi, 1970-yillardan beri kuzatilgan eng yomon inqiroz” bo‘ladi.
Bizda mavjud muammo shundaki, agar siz inflyatsiya bilan kurashsangiz, bu retsessiyaga olib keladi. Aytmoqchimanki, bu mutlaqo bema’nilik, chunki qarzlar allaqachon to‘planib qolgan, avvalgi retsessiya davrida hech qachon bunday holatni ko‘rmagan edik, — deya tushuntirdi u.
Iqtisodchining fikricha, “optimal javob” inflyatsiya kutilmalariga putur yetkazmaslik bo‘ladi.
Agar siz to‘g‘ri ish qilsangiz, ikkita muammoga duch kelasiz. Birinchisi — retsessiya, u yoqimsiz bo‘ladi. Ikkinchisi — ilgari ko‘rilmagan moliyaviy va qarz inqirozlari. Bu esa markaziy banklarning zaiflashishiga olib keladi. Bizni yomon retsessiya, yomon stagflyatsiya va yana bir yirik moliyaviy inqiroz kutmoqda. O‘ylaymanki, bu asosiy prognozdir, — deydi Nuriel Rubiniy.
Yevropa Markaziy bankining iyun oyidagi prognozida mintaqada stagflyatsiya ssenariysi ehtimoldan yiroq, deb baholangan.
Avvalroq Ilon Mask global retsessiya qancha davom etishini prognoz qilgani haqida xabar berilgandi.
Izoh (0)