Rossiya armiyasi Ukraina hududidagi energetika obyektlarini o‘qqa tutishda davom etayotganini hisobga olib, Ukraina hukumati inqirozdan chiqish yo‘li sifatida elektr energiyasini import qilishni ko‘rib chiqmoqda. Bu haqda “Kommersant” xabar bermoqda.
Mamlakat yetkazib beruvchilar bilan muzokaralar olib bormoqda. Ukraina Energetika vazirligi ma’lumotlariga ko‘ra, barcha energetika infratuzilmasining 30-40 foizi Rossiya hujumlariga uchragan.
Bu juda katta zarba. Sizga issiqlik ishlab chiqarish quvvatining kamida yarmi, balki undan ham ko‘proq qismiga zarar yetkazilganini ayta olaman. Bu hafta ular bir qator issiqlik elektr stansiyalariga zarba berishdi, — deydi Ukraina energetika vaziri German Galushchenko Reuters agentligiga.
Uning ta’kidlashicha, bu hafta o‘qqa tutilishi sababli mamlakat 4000 MVt quvvatni yo‘qotgan.
Vazirning so‘zlariga ko‘ra, Rossiya armiyasi nihoyat ularni yo‘q qilish maqsadida bir qator energetika obyektlarini yana o‘qqa tutmoqda.
15-oktabr kuni Ukraina prezidenti Vladimir Zelenskiy mahalliy hokimiyat organlari Rossiya qurolli kuchlarining 10-oktabrdan boshlangan ommaviy o‘qqa tutilishi oqibatida zarar ko‘rgan 15 ta energetika obyektini tiklaganini aytgandi.
Rossiya armiyasining Ukrainada davom etayotgan hujumlari natijasida energetika obyektlarining aksariyati ishdan chiqqan, shu munosabat bilan Ukraina rasmiylari aholini elektr energiyasini qat’iy tejashga chaqirmoqda.
Izoh (0)