2008 йилдаги инқирозни прогноз қилган Рубини дунёдаги иқтисодий вазият 1970 йиллардагидан ҳам ёмонроқлигини айтди

Америкалик иқтисодчи Нуриэл Рубини дунё нафақат инфляциянинг кескин ўсишига, балки стагфляцияга ҳам дуч келишини кутмоқда. Бу ҳақда «Коммерсантъ» хабар берди.

Унинг фикрича, жаҳон иқтисодиётидаги вазият Ғарбий Европада 1970 йилларда содир бўлган нефть инқирозидан ҳам ёмонроқ бўлади.

Нуриэл Рубини 2008 йилги иқтисодий инқирозни прогноз қилган ва шу туфайли машҳурликка эришган иқтисодчи ҳисобланади.

«Одд лоц» подкастида Нуриэл Роубини иқтисодиётга коронавирус ва Россиянинг Украинадаги уруши таъсир кўрсатганини айтди. Бундан ташқари, у глобал иқтисодиётга салбий таъсир кўрсатган яна 11 та омилни санаб ўтди.

Улар орасида: протексионизм, деглобализация, ишлаб чиқаришни Хитойдан Европа ва АҚШларга ўтказиш, аҳолининг қариши, миграциянинг чекланганлиги, Вашингтон ва Пекин ўртасидаги муносабатларнинг ёмонлашуви, геосиёсий хавфлар, иқлим ўзгариши, кибер урушлар, даромадлар тенгсизлиги, дедолларизациялар мавжуд.

Бу сафар инқироз етмишинчи йиллардагидан ҳам ёмонроқ бўлади, чунки у шунчаки қисқа муддатли ҳодиса эмас. Марказий банклар инфляция билан ҳар қандай нархда, ҳатто таназзул бўлса ҳам, ҳатто оғир оқибатлар бўлса ҳам курашамиз, дейишса, ишонмайман, — дейди эксперт.

Унга кўра, бу қисқа ва саёз рецессия эмас, балки ундан ҳам баттарроқ бўлади, кейин эса молиявий қийинчиликлар, молиявий ва қарз инқирозлари пайдо бўлади.

Рубинининг сўзларига кўра, натижада «стагфляцион қарз инқирози глобал молиявий инқироздан кейинги ўринда турувчи, 1970 йиллардан бери кузатилган энг ёмон инқироз» бўлади.

Бизда мавжуд муаммо шундаки, агар сиз инфляция билан курашсангиз, бу рецессияга олиб келади. Айтмоқчиманки, бу мутлақо бемаънилик, чунки қарзлар аллақачон тўпланиб қолган, аввалги рецессия даврида ҳеч қачон бундай ҳолатни кўрмаган эдик, — дея тушунтирди у.

Иқтисодчининг фикрича, «оптимал жавоб» инфляция кутилмаларига путур етказмаслик бўлади.

Агар сиз тўғри иш қилсангиз, иккита муаммога дуч келасиз. Биринчиси — рецессия, у ёқимсиз бўлади. Иккинчиси — илгари кўрилмаган молиявий ва қарз инқирозлари. Бу эса марказий банкларнинг заифлашишига олиб келади. Бизни ёмон рецессия, ёмон стагфляция ва яна бир йирик молиявий инқироз кутмоқда. Ўйлайманки, бу асосий прогноздир, — дейди Нуриэл Рубиний.

Европа Марказий банкининг июнь ойидаги прогнозида минтақада стагфляция сценарийси эҳтимолдан йироқ, деб баҳоланган.

Аввалроқ Илон Маск глобал рецессия қанча давом этишини прогноз қилгани ҳақида хабар берилганди.