Qashqadaryoda ekin yer maydoni uy-joy qurish uchun 30 nafar fuqaroga sotib yuborilgani aniqlandi

Qashqadaryo viloyatining Ko‘kdala tumanida ekin yer maydoni noqonuniy ravishda sotib yuborilgani aniqlanib, jinoyat ishi qo‘zg‘atildi. Bu haqda Bosh prokuratura matbuot xizmati xabar berdi.

Viloyat prokuraturasi tomonidan o‘tkazilgan tekshirishda fuqaro B.J. Ko‘kdala tumani hududidagi “X.F” fermer xo‘jaligiga ajratilgan jami 44 gektar lalmi qishloq xo‘jaligi yer maydonining 11 gektar qismini 30 nafar fuqaroga uy-joy qurish uchun sotib yuborgani aniqlangan.

Oqibatda qonun talablarini qo‘pol ravishda buzgan holda, ekin yer maydoniga 687,7 million so‘m miqdorda zarar yetkazgan.

Mazkur holat yuzasidan viloyat prokuraturasi tomonidan B.J.ga nisbatan Jinoyat kodeksining 167-moddasi (o‘zlashtirish yoki rastrata yo‘li bilan talon-toroj qilish) 3-qismi “a” bandi va boshqa moddalari bilan jinoyat ishi qo‘zg‘atilib, tergov harakatlari olib borishga kirishilgan.

Mavzuga doir: Samarqandda fermer xo‘jaligi rahbari ekin yer maydonida o‘zboshimchalik bilan uy-joy qurgani aniqlandi