Qashqadaryo viloyatining G‘uzor tumanida 57 yoshli shifokor xizmat burchini bajarayotgan paytida kaltaklandi. Bu haqda viloyat sog‘liqni saqlash boshqarmasi matbuot xizmati xabar berdi.
Qayd etilishicha, kaltaklangan shifokor T.H. 32 yildan buyon G‘uzor tumani tibbiyot birlashmasida anesteziolog-reanimatolog bo‘lib ishlaydi. Ayni paytda tumanda yaqinda ochilgan tumanlararo qo‘shma shikastlanish va o‘tkir qon tomir kasalliklari markazida faoliyat yuritmoqda.
14-oktabr kuni uning odatdagi navbatchilik kunlaridan birida kechqurun bo‘limga 1970-yilda tug‘ilgan bemor olib kelingan. Unga gipertoniya tashxisi qo‘yilib, tezkor tibbiy yordamga kirishilgan. Soat 21:00 lar atrofida davo muolajalari davom etayotgan paytda jarayonga xalaqit berayotgan bemorning 25 yoshlar atrofidagi o‘g‘li va shifokor o‘rtasida kelishmovchilik kelib chiqqan. Oqibatda bemorning o‘g‘li shifokorga musht ko‘targan.
To‘lqin Hamroyev “kalla va bosh miya shikastlanishi, bosh miya chayqalishi, burun suyagining ochiq sinishi, burun asosi ezilib, yirtilgan jarohati, yuqori jag‘ o‘ngdan qoziq tishning travmatik sinishi, ikkala qovoq-burun asosi gematomalari” tashxisi bilan travmatologiya bo‘limiga yotqizilgan.
Voqea yuzasidan tergovga qadar tekshiruv harakatlari olib borilmoqda. Viloyat sog‘liqni saqlash boshqarmasi mazkur holatni o‘z nazoratiga olgan.
Bundan avval Toshkentda 13 va 16-oktabr kunlari tez yordam xodimlari kaltaklangandi.
Izoh (0)