Ijtimoiy tarmoqlarda Toshkent davlat sirkiga har bir maktabdan 200 nafar bola majburan olib borilayotgani haqida xabar tarqaldi. Holat shahar xalq ta’limi bosh boshqarmasi ishchi guruhi tomonidan o‘rganildi.
Qayd etilishicha, ayni kunlarda Rossiya sirk ustalari poytaxtda mehmon bo‘lib turibdi. Ular ishtirokidagi tomoshalar haftaning shanba hamda yakshanba kunlari soat 15:00 da boshlanadi.
Ushbu sirk ustalarini poytaxtga taklif etgan tadbirkor J.N.ning bildirishicha, har bir tomoshaning chipta bahosi 40 ming so‘mdan 100 ming so‘mgacha qilib belgilangan.
“Xalqimiz sirk tomoshalarini o‘z xohishlariga ko‘ra katta qiziqish bilan kuzatishmoqda. Hozircha chiptalarimizni majburiy sotish va tomoshabinlarni majburan sirkka jalb etishimiz uchun ehtiyoj yo‘q. Xabarda ta’kidlanganidek, seanslar kuniga uch marta emas, atigi bir marta namoyish etilmoqda, xolos” — degan u holatni izohlab.
Poytaxt maktablaridagi vaziyat ham o‘rganilganida yuqoridagi xabar o‘z asosini topmagan. Hech bir ta’lim muassasasida bunday tashabbus kuzatilmagani aniqlangan.
Izoh (0)