O‘zbekistonda 2022-yil boshidan buyon 200 milliard so‘mlik 670 dan ortiq qishloq xo‘jaligi texnikalari lizing asosida yetkazib berildi. Bu haqda AOKAda “O‘zavtosanoat” AJ mutasaddilari, tizim tashkilotlari rahbarlari, “Avtosanoat agro lizing” kompaniyasi vakillari ishtirokida o‘tkazilgan matbuot anjumanida ma’lum qilindi.
Qayd etilishicha, 2022-yil 1-yanvardan o‘z faoliyatini boshlagan “Avtosanoat agro lizing” faoliyatining asosiy yo‘nalishi mamlakat qishloq xo‘jaligi texnikalarini ishlab chiqaruvchilarning mahsulotlarini subsidiyali va imtiyozli shartlarda fermer xo‘jaliklari va klasterlarga lizing asosida yetkazib berishdan iborat.
Bugungi kunda “Toshkent qishloq xo‘jaligi texnikasi zavodi”, “Chirchiq qishloq xo‘jaligi texnikasi zavodi”, “Agregat zavodi”, “Texnolog” aksiyadorlik jamiyatlari, “UzKlaasAgro”, “Lemken Chirchiq” qo‘shma korxonalari hamda “Toshkent agro traktor” MCHJ kabi mahalliy va xorijiy ishlab chiqaruvchilar, yetkazib beruvchilar bilan yaqindan hamkorlik yo‘lga qo‘yilgan.
Qishloq xo‘jaligi texnika va agregatlariga texnika umumiy qiymatining 15 foizi miqdorida subsidiya ajratish hamda lizing foizining 10 foizdan yuqori qismining subsidiya asosida davlat tomonidan qoplanishi ko‘zda tutilgan.
Izoh (0)