Kun.uz nashrida “Dunyodan ortda qolayotgan O‘zbekiston IIV. Poytaxt ko‘chalarida moped va skuterlarga “ov” boshlandi” nomli material e’lon qilingandi. Unda Toshkent shahrida skuter va moped egalari ushbu transport vositalarini “A” toifadagi haydovchilik guvohnomasiga ega bo‘lmasdan boshqarayotgani uchun jarimaga tortilib, transport vositasi jarima maydonchasiga joylashtirilayotgani haqida so‘z borgan. Yo‘l harakati xavfsizligi xizmati ushbu holat yuzasidan munosabat bildirdi.
Ta’kidlanishicha, Vazirlar Mahkamasining “Yo‘l harakati qoidalari”ni tasdiqlash haqidagi 172-sonli qarori 1-ilovasi 8-bandiga ko‘ra haydovchi tegishli toifadagi transport vositasini boshqarish huquqini beruvchi haydovchilik guvohnomasiga ega bo‘lishi shart, bunda:
“A” — moped, mototsikl va ularga tenglashtirilgan mototransport vositalari boshqarishga ruxsat etilishi ko‘rsatilgan bo‘lib, 6-bandi “moped” so‘ziga tushuncha berilgan.
Ya’ni moped — eng yuqori konstruktiv tezligi soatiga 50 kilometrdan, ish hajmi 50 sm3 dan oshmaydigan ichki yonuv dvigateliga ega bo‘lgan yoki nominal (belgilangan) quvvati 0,25 kilovattdan ortiq va 4 kilovattdan kam bo‘lgan elektr dvigatelli ikki yoki uch g‘ildirakli transport vositasi. Xuddi shunday tavsiflarga ega bo‘lgan kvadritsikl (kvadratsikl), tritsikl, skuter hamda yo‘lning qatnov qismida harakatlanishiga moslashtirilgan boshqa mexanik moslamalar ham mopedlarga tenglashtirilishi ko‘rsatib qo‘yilgan.
Vazirlar Mahkamasining “Yo‘l harakati qoidalari”ni tasdiqlash haqidagi 172-sonli qarori bilan tasdiqlangan “Yo‘l harakati qoidalari” O‘zbekiston hududida yo‘l harakatining yagona tartibini belgilaydi.
Hurmatli haydovchilar, mazkur “Yo‘l harakati qoidalari”ga asosan barcha eng yuqori konstruktiv tezligi soatiga 50 kilometrdan, ish hajmi 50 sm3 dan oshmaydigan ichki yonuv dvigateliga ega bo‘lgan yoki nominal (belgilangan) quvvati 0,25 kilovattdan ortiq va 4 kilovattdan kam bo‘lgan elektr dvigatelli ikki yoki uch g‘ildirakli transport vositasi, xuddi shunday tavsiflarga ega bo‘lgan kvadritsikl (kvadratsikl), tritsikl, skuter hamda yo‘lning qatnov qismida harakatlanishiga moslashtirilgan boshqa mexanik moslamalarni boshqarish uchun ham “A” toifali haydovchilik guvohnomasiga ega bo‘lishi lozimligini eslatib o‘tamiz, — deyilgan munosabatda.
Izoh (0)