Surxondaryo viloyati Sherobod tumani hokimligida investitsiyalar va tashqi savdo vazirligining hududiy boshqarmasi rahbariyati bilan Masdar kompaniyasi (BAA) vakillari o‘rtasida mazkur quyosh fotoelektr stansiyasini qurish loyihasining joriy etilishini o‘rganishga bag‘ishlangan uchrashuv bo‘lib o‘tdi. Bu haqda ITSV axborot xizmati xabar berdi.
Qayd etilishicha, uchrashuvda Osiyo infratuzilmaviy investitsiyalar banki, Osiyo taraqqiyot banki, “5 poytaxt”, Green Business Innovation kompaniyalari vakillari, fermer xo‘jaliklari, klasterlar rahbarlari, mahalliy hokimiyat organlari rahbarlari ishtirok etgan.
Suhbat chog‘ida loyihani amalga oshirish jarayoni, qurilishning navbatdagi bosqichi doirasidagi ishlarga tayyorgarlikning borishi, shuningdek, Sherobod shahri va unga tutash hududlar bo‘ylab yuqori voltli liniyalarni o‘tkazish bo‘yicha tashkiliy masalalar ko‘rib chiqilgan.
Loyihaning texnik parametrlari har tomonlama tahlil qilingandan so‘ng uni o‘z vaqtida amalga oshirish uchun zarur chora-tadbirlar ishlab chiqilgan.
Ma’lumot uchun, O‘zbekiston prezidentining tegishli qaroriga muvofiq Surxondaryo viloyati Sherobod tumanida BAAning Masdar kompaniyasi tomonidan quvvati 457 MVt bo‘lgan quyosh fotoelektr stansiyasini qurish bo‘yicha investitsiya loyihasi amalga oshirilmoqda.
Izoh (0)