Navoiyda erkak o‘zini shifoxonaning 3-qavatidan tashlab yuborgani haqida xabar berilgandi. Sog‘liqni saqlash vazirligi matbuot xizmati holat yuzasidan surishtiruv ishlari olib borilayotganini ma’lum qildi.
Aniqlanishicha, 16-oktabr kuni soat 14:10 atrofida Navbahor tumanida yashovchi (Karmana tumanida doimiy ro‘yxatda turgan) 1968-yilda tug‘ilgan fuqaro S.S. Respublika shoshilinch tibbiy yordam ilmiy markazi Navoiy filialiga bosh og‘rig‘i, bosh aylanishi, umumiy quvvatsizlik shikoyatlari bilan murojaat qilib kelgan. Bemorning so‘zlariga ko‘ra, unda shifoxonaga kelishidan 30 daqiqa avval ko‘chada tutqanoq xuruji kuzatilgan.
Tekshiruvlar natijasida fuqaro S.S.ga bosh miya yopiq jarohati, bosh miya chayqalishi, bosh ensa sohasi yumshoq to‘qimalari lat yeyishi va tutqanoq xuruji dastlabki tashxisi qo‘yilgan. Shundan so‘ng u muassasaning neyroxirurgiya bo‘limiga yotqizilib, belgilangan standartlar bo‘yicha tibbiy tekshiruvlardan o‘tkazilgan va zarur muolajalarni olgan.
Shuningdek, bugun bemorda kunning birinchi yarmida yuqori diagnostik — MSKT tekshiruvi o‘tkazilib, uning bosh miya sohasida organik o‘zgarishlar aniqlanmagan. Biroq 18-oktabr kuni soat 15:00 atrofida bemor S.S. 3-qavatdagi 2-palata derazasidan noma’lum sabablarga ko‘ra o‘zini tashlab, vafot etgan.
Hozir huquq-tartibot idoralari tomonidan ushbu holat yuzasidan tegishli surishtiruv ishlari olib borilib, voqea sabablari aniqlanmoqda.
Izoh (2)
Yoki foktor 5 millionlik dori yozib bergan
Manimcha bu bemor ocheretda turib siqilib uzizni tashlavorgan. IIV bir surishturuv qilsa bolardi